«Qyzyl aımaqtaǵy» óńirdiń biri – Atyraý. Qazir munda koronavırýs ınfeksııasynyń qaıta kóbeıýine baılanysty shekteý sharalary kúsheıtilip, taratpaý máselesi qaıta pysyqtaldy. Oblystyq densaýlyq saqtaý basqarmasy basshysynyń orynbasary Qaısar Abdalıevtiń aıtýynsha, Úkimet pen oblys ákimdiginiń qoldaýymen, sondaı-aq demeýshi kompanııalardyń kómegimen qaýipti vırýsty ınfeksııasyn juqtyrǵan naýqastardy emdeý úshin qajetti jabdyqtar satyp alynypty.
– Atap aıtqanda, oblystaǵy aýrýhanalar 4 MRT, 12 kompıýterlik tomografııa, 41 rentgen apparatymen qamtyldy. Buǵan qosa aýrýhanalarda 669 ottegi konsentratory, 1 514 pýlsoksımetr, 267 ókpeni jasandy jeldetý apparaty bar. Segiz aýrýhanada ottegi stansasy iske qosyldy, – deıdi Q.Abdalıev.
Onyń málimetinshe, jedel medısınalyq járdem stansasynyń avtoparki tolyq jańartylypty. Qazir bul stansada «103» qyzmetine túsken shaqyrýǵa baratyn 113 arnaıy kólik pen 7 jyljymaly medısınalyq keshen bar.
Oblystyq densaýlyq saqtaý basqarmasy baspasóz qyzmetiniń aqparatyna qaraǵanda, PTR-test júrgizetin 15 zerthana jumys istep tur. Bul zerthanalarda byltyrǵy naýryzdan beri júrgizilgen PTR-test sany 827 myńǵa jetip otyr. Qazir táýligine 8 300 PTR-test zertteýin júrgizýge bolady. Al bıylǵy naýryzda koronavırýs ınfeksııasyna qarsy 95 myń PTR-test alynypty.
Alaıda oblystyń bas memlekettik sanıtar dárigeri Mádenıet Tanaýov koronavırýs ınfeksııasynyń órshýi áli báseńdemegenin jetkizdi. Onyń málimetine súıensek, qaýipti vırýs naýqaspen jaqyn qarym-qatynasta bolýdan 22,5%, qoǵamdyq kólikte júrýmen baılanysty 7,2%, adamdar kóp jınalatyn oryndarǵa barǵannan 26,9%-ǵa artqan. Al vahtalyq kentterde jumys isteıtinder arasynda, turatyn jerinde juqtyrý 43%-dy qurap otyr.
– Jyl basynan beri 6 546 reıdtik tekserý ótkizilip, 27 296 nysan qamtyldy. Monıtorıngtik toptar 213 quqyq buzýshylyqty anyqtady. Al naýryzda anyqtalǵan 64 quqyq buzýshylyqqa qatysty shaǵyn jáne orta bıznes nysandaryna, jeke tulǵalarǵa 3 mln 853 myń teńgeniń 49 aıyppuly salyndy. Bul aıda adamdardyń otbasylyq sharalarǵa kóptep qatysýynan koronavırýs ınfeksııasy 18 paıyzdan 26,9 paıyzǵa joǵarylady, – deıdi M.Tanaýov.
Al oblystyq densaýlyq saqtaý basqarmasy baspasóz qyzmetiniń aqparatyna qaraǵanda, 1 aqpannan beri Spýtnık V vaksınasynyń birinshi komponentin 3 600 adam saldyrypty. Al, ekinshi komponentin 1 255 adam alyp otyr. Eki aıda vaksına saldyrǵandardyń arasynda 1 611 medqyzmetker, 1 413 pedagog, 486 polıseı bar. Sondaı-aq memlekettik qyzmettiń 42 ókili vaksına saldyrdy. Endi búgin, 2 sáýirde Spýtnık V vaksınasynyń taǵy da 3 600 dozasy jetkizilmek.
Atyraý oblysy