Batys Qazaqstan oblysynda «Meniń aýlam – meniń baǵym» jobasy bastalǵanyn budan buryn habarlaǵan bolatynbyz. Bul jobaǵa turmysy tómen otbasylardan bólek, mektep oqýshylary da qatysatyn boldy. Baǵban oqýshylarǵa jaz kezinde 42 500 teńge jalaqy tólenbek, dep habarlaıdy Egemen.kz
Bul týraly áleýmettik jelidegi paraqshasynda habarlaǵan Batys Qazaqstan oblysynyń ákimi Ǵalı Esqalıev qazirdiń ózinde óńirde 1270 adam baqsha otyrǵyzýǵa tapsyrys bergenin aıtty. Sonyń ishinde 54 adam memleket tarapynan beriletin grant esebinen jobaǵa qatyspaq. Nıet bildirýshilerdiń kópshiligi Tasqala, Aqjaıyq, Qaratóbe, Bókeıordasy jáne Shyńǵyrlaý aýdandarynan eken. Turǵyndar kóbinese alma, órik, shıe, almurt, tańqýraı, qulpynaı jáne júzimge tapsyrys bergen.
«Bul joba óte mańyzdy ekenin osyǵan deıin atap ótken bolatynmyn. Osy rette, jobany iske asyrýǵa jáne halyq arasynda keńinen nasıhattaýǵa óz úlesterin qosyp kele jatqan eriktilerge, blogerlerge, aýyldyq okrýg ákimderine alǵysymdy bildiremin» deıdi Ǵalı Esqalıev.
«Meniń aýlam – meniń baǵym» jobasynyń bir ereksheligi – oqýshylaryn eńbekke baýlyp, baý-baqsha jumysyna tartý úshin Oral qalasy jáne 12 aýdannan 70 mektep tapsyrys bergen. Jazǵy demalys kezinde mektep janyndaǵy baý-baqshada jumys isteýge qulshynys bildirgen balalarǵa jergilikti ákimdik aıyna 42,5 myń teńge tóleıtin boldy. Bul iske 14 jastan asqan oqýshylar tartylmaq.
Atalǵan jobaǵa qatysýshylarǵa jergilikti aýa-raıyna jersindirilgen jemis aǵashtarynyń kósheti berilmek. Jáne olarǵa tájirıbeli tálimgerler keńes beretin bolady. Jergilikti ákimdik bul jemis aǵashtarynyń ónimin memlekettik satyp alý isin de uıymdastyrýǵa ýáde berip otyr.
Oral qalalyq bilim bóliminiń aqparatyna qaraǵanda, «Meniń aýlam – meniń baǵym» jobasyna oblys ortalyǵyndaǵy bilim nysandary túgel qatyspaq. Odan bólek, Oral qalalyq ákimdigi men qalalyq bilim berý bólimi birlesip bastaǵaly otyrǵan «Mektep. Alma baǵy. Oqýshy» jobasyna qalanyń jeti mektebinen 120 oqýshy qatysýǵa yqylas bildiripti. Bul oqýshylarǵa da Oral qalalyq jumyspen qamtý ortalyǵy 42 500 teńge aılyq jalaqy tóleıdi.
Turmysy tómen otbasylardy qoldaýǵa arnalǵan «Eńbek» baǵdarlamasyn jetildirý jóninde oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Isataı Myńbaev birazdan beri aıtyp kelgen bolatyn. «Meniń aýlam – meniń baǵym» jobasy – osyndaı izdenistiń bir nátıjesi. Al osy jumystarǵa stýdentter men oqýshylardy tartý – jas urpaqty eńbekke baýlýdyń jarqyn kórinisi deýge bolady. О́tken jyly osyndaı jumystarǵa «Eńbek» memlekettik baǵdarlamasy aıasynda 364 stýdent pen 1286 joǵary synyp oqýshysy túrli qyzmetke tartylyp, olarǵa jumyspen qamtý ortalyǵy arqyly eńbekaqy tólengen.
Batys Qazaqstan