Osydan tup-týra 60 jyl buryn Baıqońyr ǵarysh aılaǵynan «Vostok-1» kemesi áýege kóterilip, adamzat balasy alǵash ret ǵarysh keńistigine kóterilgen bolatyn. Sodan beri 12 sáýirdi Dúnıejúzilik avıasııa jáne ǵaryshkerler kúni retinde atap ótip kelemiz. Bıyl da solaı. Elordadaǵy Ulttyq áskerı-patrıottyq ortalyǵynda qazaqstandyq tuńǵysh ǵaryshkerdiń aspan álemin baǵyndyrǵanyna 30 jyl tolýyna oraı «Ǵaryshqa jol» taqyrybynda keleli kezdesý uıymdastyryldy.
Nur-Sultan qalasy ákimdiginiń «Astana jastary» kommýnaldyq memlekettik mekemesiniń qoldaýymen «Jas sarbaz» jasóspirimder áskerı-patrıottyq qozǵalysy» respýblıkalyq qoǵamdyq birlestigi uıymdastyrǵan kezdesýge ǵaryshkerler Talǵat Musabaev pen Aıdyn Aıymbetov qatysty. Kezdesý aıasynda «Jas sarbaz» tárbıelenýshileriniń patrıottyq rýhyn kóterip, olardyń Otanǵa degen súıispenshiligin qalyptastyratyn «Erlik sabaǵy: kitapqa jazylmaǵan tarıh» taqyrybynda erlik sabaǵy qolǵa alyndy.
– Bul erlik sabaǵy – Qazaqstannyń búgingi jastary, bolashaq el qorǵandary úshin arnaıy uıymdastyrylyp otyr. Búgin sizder álemdik deńgeıde aty áıgili ǵaryshkerlermen júzdesip otyrsyzdar. Sondyqtan bul kezdesýdiń sizderge bereri mol bolady degen senimdemin. Bilimderińizdi ushtap, tájirıbelerińizdi shyńdap, taý tulǵalarǵa qarap boı túzeısizder degen oıdamyn. Osyndaı kezdesýler jigerlerińizdi janıdy, qanattaryńyzdy qataıtady. Aldaǵy bıik belesterdi baǵyndyrýǵa úlken úles qosady. Árıne ǵarysh keńistigin zertteý jumysy bir orynda turmaıtyny anyq. Bálkim aralaryńyzda bolashaq ushqyshtar, planetaaralyq saparlarǵa shyǵatyn keleshek ǵaryshkerler otyrǵan bolýy múmkin, – dedi avıasııa general-maıory Nurlan Kárbenov.
«Jas sarbazdarmen» kezdesý barysynda ǵaryshkerler aǵalyq aq tilekterin jaýdyryp, aqyl-keńesterimen, mundaı saparlardyń mańyzdylyǵymen bólisti.
– Jas sarbazdar, sizdermen kezdeskenime óte qýanyshtymyn. Bul kún men úshin asa mazmundy ári mańyzdy mereke sanalady. Men úshin ǵana emes, búkil álem úshin solaı dep senemin. Oılap otyrsam, osy kúnge deıin úsh ret ǵaryshta bolyp, onda bas-aıaǵy bir jylǵa jýyq jumys isteppin. Alǵashynda qazaq eliniń ókili retinde áýege kóterilsem, qalǵan ekeýinde komandır bolyp jol bastap barǵan jaıym bar. Ekıpaj quramynda orystar da, amerıkalyqtar da, nemister de, fransýzdar da boldy. Solardyń arasynda qarapaıym qazaqtyń balasy bola turyp, komandır bolǵanyma qýanamyn, – deıdi avıasııa general-leıtenanty, Halyq qaharmany Talǵat Musabaev.
El syılaǵan tuǵyrly tulǵalar ótken kúnderdegi eleýli estelikterimen bólisip, oramdy oılaryn ortaǵa saldy. О́skeleń urpaqtyń kóńiline senim uıalatyp, júregine jaryq nur shasha bildi.
– Qyzmet jolym avıasııa general-maıory Nurlan Kárbenovpen birge Lýgovoıda bastaldy. Ol kezde jas ofıserler edik. Áskerı shenim – leıtenant bolatyn. Al Talǵat aǵa Musabaev meniń ustazym boldy. Ǵaryshkerler tobymen birge daıyndyqtan ótip júrgenimde osy Talǵat Amangeldiuly barlyǵyn basqaryp, jetekshilik jasady. Qazirgi meıirimdi júzine «aldanyp qalmańyzdar» (kúldi). Kerek kezinde qatal da qaharly, jaýapty bola biledi. Bizdiń belgili bir jetistikke jetýimizge de osy Talǵat aǵanyń temirdeı tártibi, qataldyǵy sebep boldy. Osylaısha men de ǵaryshqa attanyp, ǵylymı baǵdarlamany oryndadym. Talǵat Amangeldiulynyń ǵaryshqa úsh márte sapary kezinde jasalǵan tájirıbelerdi jalǵastyrdyq. Sondaı-aq Qazaq taǵamtaný akademııasynyń tájirıbeleri de júıeli júrgizildi. Ol baǵdarlamanyń aty «Dastarqan 6» edi. Osylaısha, bizdiń taǵamtaný akademııamyz ǵarysh saparlaryna arnalǵan taǵamdardy ázirleı bildi. Iаǵnı sýblımasııalanǵan taǵamdardyń qatarynda ulttyq taǵamdarymyz da boldy, – deıdi general-maıor Aıdyn Aıymbetov.
«Jas sarbaz» tárbıelenýshileri ǵaryshkerlerdiń mándi de maǵynaly áńgimelerin erekshe yqylaspen tyńdap, olardyń qyzyqty oqıǵalarymen de tereń tanysa aldy. Kókeıde júrgen suraqtaryn qoıyp, beıbit kúnniń batyrlarymen emen-jarqyn sóılesti. Kezdesý sońynda qadirli meımandar arnaıy ǵarysh kúnine oraı Ulttyq áskerı mýzeıindegi «Ǵaryshqa jol» kórmesiniń ashylý saltanatyna qatysty.