Maı toptyq sý qubyryndaǵy sýdyń sapasy barlyq talaptarǵa sáıkes keledi, ol aýyz sý retinde paıdalanýǵa jaramdy. Mundaı qorytyndyny Pavlodar oblysy boıynsha Ulttyq saraptama ortalyǵynyń Maı aýdandyq bólimshesiniń sarapshylary jasady, dep habarlaıdy Egemen.kz Ekologııa, geologııa jáne tabıǵı resýrstar mınıstrliginiń baspasóz qyzmetine silteme jasap.
Osylaısha, óndiristik baqylaý toqsan saıyn Baskól jáne Aqjar aýyldaryndaǵy magıstraldyq sý qubyrynda júrgiziledi. Sý sapasyna kelesi baqylaý aǵymdaǵy jyldyń 20 sáýirinde júrgiziletin bolady.
Sý resýrstary komıtetiniń ókilderi jumys saparymen Pavlodar oblysy Maı aýdanynyń Malaısary aýylyna bardy. Sapar barysynda jergilikti turǵyndarmen kezdesý ótkizildi. Júrmeli jıynda, aýyldyń turǵyndary aýyz sýdyń sapasyna qatysty biraz máseleler kóterdi. Kezdesý qorytyndysy boıynsha, Sý resýrstar komıtetimen birlese aýyz sýdyń sapasyna ashyq táýelsiz zerthanalyq zertteý júrgizý týraly sheshim qabyldandy.
Esterińizge sala keteıik, Sý resýrstary komıtetiniń bastamasymen Pavlodar oblysynyń Maı aýdanynda jergilikti toptyq sý qubyryn qaıta qurý jobasy júzege asyryldy. Nátıjesinde, 2020 jyldyń mamyr aıynda sýdy tazartý stansııasy iske qosyldy, bul 11 myń halqy bar 16 aýyldy sapaly aýyz sýmen qamtamasyz etýge múmkindik berdi.
Sý qubyrynyń uzyndyǵy 146 km quraıdy, sýmen jabdyqtaý kózi jer asty sýlary bolyp tabylady. Jobalyq ónimdiligi-táýligine 4150 m3.
Maı toptyq sý qubyryn qaıta qurý jáne sý tazartý stansııasyn iske qosqannan keıin aýdan halqy sapaly aýyz sýdy ǵana emes, sonymen qatar turmystyq maqsattar úshin tazartylǵan sýdy da aldy.
Qazirgi ýaqytta toptyq sý qubyry josparly rejımde jumys isteıdi.