Túrkistan oblysynda ólimmen aıaqtalǵan jol-kólik oqıǵasy úshin kináli júrgizýshi bes jylǵa sottaldy, dep habarlaıdy Egemen.kz Polisia.kz saıtyna silteme jasap.
О́tken jyldyń jeltoqsan aıynyń sońynda Saryaǵash-Qazyǵurt tas jolynda Mitsubishi Carisma júrgizýshisi qarsy jolaqqa shyǵyp ketip, Opel Vectra-men soqtyǵysqan edi.
Apat saldarynan Opel Vectra kóliginiń júrgizýshisi sol jerde qaıtys boldy. Jaraqat alǵan jolaýshylardyń biri jansaqtaý bólimine jetkizildi. Alaıda, biraz ýaqyttan keıin ol da kóz jumǵan.
Oqıǵa ornyna jedel-tergeý toby qyzmetkerleri baryp, qajetti sharalardy júrgizdi. Tekserý barysynda qarsy betke shyǵyp ketken 45 jastaǵy júrgizýshiniń alkogoldik ishimdik ishkeni anyqtaldy.
Atalǵan fakti Qazaqstan Respýblıkasy Qylmystyq kodeksiniń 4-bóliginiń 345-1-baby «Kólik quraldaryn mas kúıinde basqaratyn adamdardyń jol qozǵalysy erejelerin nemese kólik quraldaryn paıdalaný erejelerin buzýy» boıynsha tirkeldi.
Tergeý aıyptaý qorytyndysymen sotqa deıingi tergeýdiń jınaqtalǵan materıaldaryn prosessýaldyq sheshim qabyldaý úshin sotqa jiberdi.
Jábirlenýshi tarappen tatýlasýyna jáne sottalýshynyń buryn sot aldynda jaýap bermeýine baılanysty Mitsubishi Carisma júrgizýshisi sot sheshimimen bes jylǵa bas bostandyǵynan aıyryldy.