Abdaly Nuralıev pen Bekbolat Orynbekov Jambyl oblysyna sapary kezinde Qordaı aýdanynyń turǵyndarymen kezdesip, aýyl turǵyndarymen óńirdegi problemalardy talqylady, dep habarlaıdy Egemen.kz.
Gvardeısk kentindegi Bıologııalyq qaýipsizdik problemalary ǵylymı-zertteý ınstıtýtynyń bazasynda ótken jergilikti aktıvpen kezdesýde senatorlar pandemııa kezinde ortalyq qyzmetkerleriniń qyzmetine erekshe mán berilgenin aıtty.
«Búkil álemdi sharpyǵan pandemııa kezinde Bıologııalyq qaýipsizdik problemalary ǵylymı-zertteý ınstıtýtyna zor jaýapkershilik júktelgen. Qysqa ýaqyt ishinde munda qajetti ınfraqurylymy bar zamanaýı ǵımarat salyndy. Zaýyt qyzmetkerlerine arnalǵan turǵyn úı qurylysy da aıaqtalýǵa jaqyn. Sondyqtan qyzmetkerler halyq densaýlyǵy úshin belsendi jumys isteýi tıis», dep atap ótti senator Bekbolat Orynbekov.
Depýtattar sonymen qatar Kenen Ázirbaevtyń ádebı-memorıaldyq murajaıynda boldy. Onda ótken jyly kúrdeli jóndeý júrgizilgen bolatyn. Uzaq ýaqytqa jumysyn toqtatqan Qordaı ótkizý pýnkti de bıylǵy jyldyń sáýir aıynda tolyq qaıta jańǵyrtýdan keıin óz qyzmetin qaıta bastady.