Seısenbiden sársenbige qaraǵan túni fýtboldan ÝEFA Chempıondar lıgasynyń jartylaı fınaldyq saıysynda Anglııanyń «Manchester Sıtı» jáne Fransııanyń PSJ klýbtary kúsh synasty.
Parıjde ótken alǵashqy match 2:1 esebimen qonaqtardyń paıdasyna sheshilgen edi. Bul joly da aǵylshyndardyń basymdyǵy anyq baıqaldy. 11-mınýtta Rıaıad Marez esep ashty – 1:0. Jyldam soǵylǵan goldan keıin fransııalyq klýbtyń oıynshylary eseni qaıtarýǵa jantalasqanymen, olardyń bul áreketinen esh nátıje shyqpady. Iá, qonaqtardyń keminde eki ret tarazy basyn teńseltýlerine múmkindigi bolǵany ras. Alǵashynda Markınostyń baspen baǵyttaǵan doby mańdaıshaǵa tıse, ekinshi retinde Anhel Dı Marııa alystan bos qaqpany dál kózdeı almady.
Úzilisten keıin PSJ-nyń órenderi dóreki oınaı bastady. 63-mınýtta Marez ekinshi márte mergendik tanytty – 2:0. Sodan keıin-aq oıynnyń máni de, sáni de ketti. Qos komandanyń oıynshylary bir-birimen qaıta-qaıta eregesip, janjaldasyp, ustasyp, julysyp, táp-táýir ótip jatqan básekeniń berekesin qashyrdy. Nátıjesinde 69-mınýtta Dı Marııa alańnan qýyldy. Onsyz ja jeńilip jatqan qonaqtar úshin bul óte aýyr soqqy boldy. Sodan keıin tablodaǵy esep ózgergen joq.
Osylaısha, «Manchester Sıtı» óz tarıhynda tuńǵysh ret ÝEFA Chempıondar lıgasynyń fınalyna shyqty.