Qazaqstan Prezıdenti Qasym-Jomart Toqaev memlekettik nagradalar tapsyrý rásiminde «Jýsan» arnaıy operasııasy týraly pikir bildirdi, dep habarlaıdy Egemen.kz
«Armııa men kúsh qurylymdary eldiń egemendigi men ulttyq qaýipsizdiktiń basty kepili bolyp tabylady. Álemdegi jahandyq kataklızmder men geostrategııalyq qubylmaly jaǵdaıda áskerı qyzmetshilerdiń róli birneshe ese artady. Sizder Táýelsizdigimizdi qorǵaý isinde bekem tursyzdar. Sizderdiń kúsh-jigerlerińizdiń arqasynda Qazaqstan óńirlik jáne halyqaralyq turaqtylyqtyń donory retinde tanyldy. Bizdiń áskerı qyzmetshilerimiz Birikken Ulttar Uıymynyń bitimgershilik mıssııasy sheńberinde qoıylǵan mindetterdi tabysty oryndaıdy», dedi Memleket basshysy.
Osy oraıda Prezıdent «Jýsan» arnaıy operasııasynyń minsiz ótýi ulttyq qaýipsizdik organdary qyzmetkerleriniń joǵary kásibıliginen dep atap ótti.
«Polısııa men prokýratýra qyzmeti birtindep jetildirilip keledi. Meniń tapsyrmam boıynsha quqyq qorǵaý júıesin reformalaý bastaldy. Onyń tıimdi iske asyrylýy bılik ınstıtýttaryna degen senim deńgeıin edáýir arttyryp, qoǵamdaǵy quqyqtyq tártip pen áleýmettik ádilettilikti nyǵaıtýdy qamtamasyz etedi. Eldiń qorǵanys qabiletin kúsheıtý úshin memleket Qarýly Kúshterdiń jaýyngerlik ázirligi men jaraqtandyrylýyna jiti nazar aýdaryp otyr. Áskerlerge júıeli negizde qarý-jaraq pen áskerı tehnıkanyń eń zamanaýı úlgileri kelip túsip jatyr. Áskerı qyzmetshilerdiń, quqyq qorǵaý organdary qyzmetkerleriniń jalaqysy men áleýmettik qorǵalý deńgeıi kezeń-kezeńimen artyp keledi», dedi Qasym-Jomart Toqaev.