Senator Aqylbek Kúrishbaev óziniń depýtattyq saýalynda tuqym sharýashylyǵy men seleksııalyq ǵylym salasyndaǵy eleýli problemalar týraly aıtyp berdi. Depýtat salada kúrdeli jaǵdaı týyndaǵanyn jáne ony sheshýdi kesheýildetýge bolmaıtynyn atap ótti. Bul týraly Senattyń baspasóz qyzmeti habarlady.
Aqylbek Kúrishbaevtyń aıtýynsha, tuqymdyq materıal sapasy tómendep barady, al aýyl eńbekkkerleri jyl saıynǵy jınaıtyn egin de azaıa túsýde. Senatordyń aıtýynsha, ónim sorttary men býdandarynyń shamamen 70%-y, al birqatar daqyldar jáne odan da kóbiregi bizge shetelden ákelinedi. Demek, biz ımporttyq ónimderge tolyq táýeldimiz jáne azyq-túlik salasyndaǵy táýelsizdigimizdi de joǵaltýdamyz. Sonymen qatar, ákelinetin tuqymdardyń basym kópshiligi bizdiń topyraq pen klımattyq jaǵdaıymyzǵa beıimdelmegen bolyp otyr.
Sonymen qatar, depýtat bólingen memlekettik sýbsıdııalar sheteldik tuqymdardy arzandatýǵa jumsalatynyna narazy. Bul rette, otandyq agrarshy ǵalymdarǵa óz jumystaryn júrgizý úshin bıyl áli kúnge deıin qarjy bólingen joq.
Osyǵan baılanysty Aqylbek Kúrishbaev ǵylymdaǵy jaǵdaıdy jaqsartý jóninde birqatar usynystaryn aıtty. Onyń basty maqsaty - joǵary ónimdi jáne kúızeliske tózimdi sorttar men daqyldardyń býdandaryn ázirleý bolýy kerek. Bul úderiske mindetti túrde otandyq agrarlyq ǴZI men joǵary oqý oryndary, bıotehnologııa ortalyqtary, sondaı-aq jetekshi sheteldik ǵalymdar qosylýy tıis. Bul úderisti zańnamalyq qoldaý da mańyzdy.
«Seleksııa men tuqym sharýashylyǵyndaǵy avtorlyq quqyqtardy qorǵaý, qazirgi zamandaǵy sertıfıkattaý ádisterin qoldana otyryp seleksııalyq jetistikterdi tirkeý, standarttar men ǵylymı-ádistemelik bazany jańartý jónindegi zańnamalyq jáne normatıvtik bazany kúsheıtý qajet. Sondaı-aq seleksııa jáne tuqym sharýashylyǵy sýbektileriniń materıaldyq-tehnıkalyq jáne zerthanalyq bazasyn nyǵaıtýǵa kómek kórsetý, elde aýyl sharýashylyǵy daqyldarynyń genetıkalyq resýrstarynyń Ulttyq bankin uıymdastyrý mańyzdy», dedi Aqylbek Kúrishbaev.
Senator sondaı-aq tuqym sharýashylyǵy júıesine memlekettik qoldaýdy kúsheıtip, otandyq sorttardy sýbsıdııalaý tetigin qaıta qaraý kerek dep sanaıdy.
«Bul usynystardyń bári 2021-2025 jyldarǵa arnalǵan AО́K damytý jónindegi ázirlenip jatqan ulttyq jobada kórinis tapqany jón», dep atap ótti senator.