Elimizdegi respýblıkalyq mańyzy bar Nur-Sultan-Pavlodar tas joly bıylǵy jyldyń jazynan bastap barlyq kólik túrleri úshin aqyly bolady. Al Pavlodar-Semeı-Omby joldary tek jeńil kólik túrlerine tegin bolady, dep habarlaıdy Egemen.kz.
«QazAvtoJol» Ulttyq kompanııasynyń málimetinshe, alǵashqy aqyly jol Nur-Sultan-Pavlodar avtobany arqyly ótedi.
«Qazirdiń ózinde baqylaý orny daıyn. Tólem júıesi ashyq bolady, ıaǵnı eshqandaı shlagbaým bolmaıdy. Ár ótkizý ornynda skaner, kamera ornatylǵan, olar kólik nómirin, qozǵalys jyldamdyǵyn jáne basqa da derekterdi eskeredi. Pavlodar-Nur-Sultan tasjoly birinshi sanattaǵy joldarǵa jatady. Sondyqtan júk jáne jeńil kólik úshin aqyly bolady. Pavlodar-Omby jáne Pavlodar-Semeı tas joldary jeńil kólikter úshin tegin bolady», dedi Pavlodar oblystyq «QazAvtoJol» UK AQ bólimshe dırektory Aqylbek Qabyldın.
Vedomstvo ókiliniń aıtýynsha, qozǵalys quny kólik túrine baılanysty bolady. Alaıda, avtoban naqty qaı kúni aqyly bolatyny aıtylmaǵan.
«Aqyly júıeni bıyl maýsymda engizý josparlanyp otyr. Qarjy joldardy kútip ustaýǵa jáne tolyq qyzmet kórsetýge, qosymsha arnaıy tehnıka satyp alýǵa jumsalady. Sondaı-aq bıyl ortasha jóndeý jáne kútip ustaý aıasynda Pavlodar-Nur-Sultan avtojolyna qosymsha qar ustaıtyn qorshaýlar ornatýdy josparlap otyrmyz», dedi Aqylbek Qabyldın.
Aıta keteıik, bıyl aqpanda respýblıkalyq mańyzy bar 4 tas jol avtomatty rejımde jumys isteıdi dep habarlanǵan edi.
Jyl sońyna qaraı respýblıkalyq mańyzy bar taǵy 18 jol aqyly bolady dep josparlanýda.