Máýlen Áshimbaevtyń tóraǵalyǵymen Palata Bıýrosynyń otyrysy ótti. Onda 27 mamyrda ótetin Senat otyrysynyń kún tártibi talqylandy, dep habarlaıdy Egemen.kz.
Senatorlar aldaǵy otyrysta «Kvazımemlekettik sektordyń jekelegen sýbektilerin satyp alý týraly» jáne «Qazaqstan Respýblıkasynyń keıbir zańnamalyq aktilerine kvazımemlekettik sektordyń jekelegen sýbektilerin satyp alý máseleleri boıynsha ózgerister men tolyqtyrýlar engizý týraly» zań jobalaryn qaraıdy.
Bul qujattar ulttyq basqarýshy holdıngterdiń jumys isteýin qamtamasyz etý jáne jarǵylyq qyzmetin oryndaý úshin qajetti taýarlardy, jumystar men qyzmetterdi satyp alýdy retteýdiń zańnamalyq negizin qalyptastyrýǵa yqpal etedi. Sonymen qatar zań jobasynda Qazaqstan Respýblıkasynyń jekelegen kvazımemlekettik sektor sýbektilerin satyp alý týraly zańnama talaptarynyń saqtalýyn baqylaý reglamenti naqtylanady jáne oǵan is-áreketterge shaǵymdaný jónindegi normalar engiziledi.
Senat otyrysynda depýtattar «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgerister engizý týraly hattamany ratıfıkasııalaý týraly» zań jobasyn da qaraıdy.
Budan basqa, Bıýro otyrysy barysynda Májilisten kelip túsken «Qazaqstan Respýblıkasynyń keıbir zańnamalyq aktilerine aýdandyq, qalalyq jáne aýyldyq bılik deńgeıleriniń derbestigi men jaýapkershiligin keńeıtý máseleleri boıynsha ózgerister men tolyqtyrýlar engizý týraly» zań jobasy boıynsha Ekonomıkalyq saıasat, ınnovasııalyq damý jáne kásipkerlik komıteti bas komıtet bolyp belgilendi.