Oqý jylyn aıaqtaǵan oqýshylardyń bári de jaz mezgilin oıdaǵydaı ótkizgisi keledi. Búginde olardyń jazǵy maýsymyn tıimdi ótkizý maqsatynda Jambyl oblystyq bilim basqarmasy tıisti jumystar júrgizýde. Bul rette oryn alyp otyrǵan ahýalǵa baılanysty sanıtarlyq talaptar meılinshe saqtalatyn bolady.
Bıylǵy jazǵy demalys maýsymynda óńirdegi 1 jáne 10-synyp arasyndaǵy 223 432 oqýshyny tolyq saýyqtyrýmen qamtý josparlanyp otyr. Onyń 70,3 paıyzy jazǵy saýyqtyrý jáne demalys sharalarymen, al 30,7 paıyzy eńbekpen jáne demalys sharalarymen qamtylady dep josparlanǵan.
«Osy maqsatta kópbalaly, sondaı-aq az qamtylǵan otbasy balalarynyń jazǵy saýyqtyrý demalysyna jergilikti bıýdjetten 555 mln 877 myń teńge qarastyrylǵan. Oblys boıynsha qala syrtyndaǵy 11 saýyqtyrý lageri jumys isteıdi dep josparlanýda. Qazirgi ýaqytta qala syrtyndaǵy saýyqtyrý lagerlerinde balalardy demalyspen qamtý maqsatyndaǵy konkýrs jarııalandy. Sonymen qatar jaz ýaqytynda sanıtarlyq-epıdemııalyq talaptardy saqtaı otyryp, týrıstik saıahattar men ekskýrsııalardy jáne sporttyq jıyndardy uıymdastyrý josparlanýda. Oǵan shamamen 22 myńǵa jýyq oqýshyny qamtý boıynsha jumystar júrgizilýde», deıdi oblystyq bilim basqarmasynyń basshysy Gúlnár Hodjabergenova.
Sondaı-aq búginde oblystaǵy mektepter men mektepten tys bilim mekemelerindegi til úırený, óner jáne tehnıka baǵyttary boıynsha úıirmelerine 6 myńǵa jýyq balalardy tartý kózdelgen.
Al jergilikti ákimdikter men tıisti mekemelerge qarasty aýla klýbtarynda 31 myńnan astam balany qyzyǵýshylyqtary boıynsha qamtý josparlanǵan. Basqarma basshysy jetim jáne ata-analarynyń qamqorlyǵynsyz qalǵan, sondaı-aq qamqorlyqqa alynǵan jáne patronattaǵy 1 012 balany, 41 289 az qamtylǵan otbasylardyń balalaryn, múmkindigi shekteýli 915 balany, dıagnozdaryna baılanysty jáne devıantty minez-qulyqty 1 136 balany jergilikti ahýalǵa baılanysty jazǵy demalyspen qamtý josparlanyp otyrǵanyn da jetkizdi.
«Búginde jalpy bilim beretin mektepter «Jazǵy demalys kezinde saýyqtyrýdy, demalysty jáne jumyspen qamtýdy uıymdastyrýdyń ózekti máseleleri» taqyrybynda aǵymdaǵy jylǵy 16 sáýir kúni ótken respýblıkalyq keńestiń usynymdary boıynsha jumystar júrgizýde», deıdi ol.