TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov eldegi shomylý maýsymyna daıyndyq jumystaryn baıandady, dep habarlaıdy Egemen.kz.
Qazirgi tańda elimizde shomylýǵa ruqsat berilgen 469 oryn bar, onyń ishinde 118 kommýnaldyq jáne 275 jeke jaǵajaı belgilengen. Shomylý maýsymy 1 maýsymda resmı bastalady.
«Qazaqstanda 50 myńnan astam sý aıdyny bar, TJM qutqarý bólimsheleri adam kóp jınalatyn sý aıdyndarynyń 125 ýchaskesin baqylaıdy, onda kún saıyn 493 qutqarýshy kúndelikti qyzmet atqarady.Bıyl sý akvatorııalaryn qamtýdy ulǵaıtý jáne azamattardyń qaýipsizdigin qamtamasyz etý úshin qaýipti jáne kúzetilmeıtin sý aıdyndarynda qosymsha 48 kóshpeli qutqarý beketi qoıylady», dedi Baýyrjan Syzdyqov.
Ákimdikter jáne sý mańyndaǵy demalys oryndarynyń ıeleri birlesip, TJM jedel-qutqarý jasaqtarynda daıarlyqtan ótken 250 qutqarýshyny tarta otyryp, 108 nysandyq qutqarý beketin qurdy. Sýda zardap shekkenderge alǵashqy medısınalyq kómek kórsetý úshin óńirlerde 97 medısınalyq pýnkt daıyndaldy.
«Qalalyq jaǵajaılarda sýǵa túsýge arnalǵan qaýipsiz balalar jaǵajaıy jabdyqtalatyn oryn ashylady, ol jerde bizdiń qutqarýshylar balalardy júzýge úıretedi. Sý aıdyndarynda qaıǵyly oqıǵalardyń aldyn alý úshin 2,5 myńnan astam eskertý belgisi ornatylǵan, halyq arasynda 70 myńnan astam úgit-nasıhat taratylǵan. Elimizdiń barlyq óńirlerindegi shomylýǵa tyıym salynǵan jáne ruqsat etilgen oryndardy 2GIS kartografııalyq platformasyna ornalastyrý úshin avıasııalyq jáne temirjol kóliginiń múmkindikterin paıdalaný máseleleri pysyqtalýda», deıdi B. Syzdyqov.