Keıingi jyldary elimizde turmysqa qajetti, qolaılylyǵy qarastyrylǵan jabaıy tabıǵatta demalatyn ekotýrızmniń jańa túri damı bastady. Pandemııa saldarynan qaladaǵy qoǵamdyq oryn, mýzeı, demalys oryndaryna shekteý qoıylǵandyqtan, turǵyndar arasynda ekotýrızmge degen qyzyǵýshylyq kúrt artty. Jýyrda Aqmola oblysy Birjan sal aýdanyndaǵy Jókeı kóli jaǵasynda «Juldyzdy orman» atty glempıng demalys aımaǵy ashyldy.
Joba avtory Aınur Qýanyshqyzynyń aıtýynsha, búginde qalyptasqan jaǵdaılar ishki týrızmdi damytýǵa baǵyttalǵan jobalardy iske asyrýǵa úlken múmkindik beredi. «Bizdiń oıymyzsha, glempıngter jelisin qurý – mańyzdy baǵyttardyń biri. Qatań karantındik talaptarǵa sáıkes kóptegen adam taza aýada demalýǵa tyrysady».
Jańa demalys aımaǵynda qonaqtarǵa tórt adamnan turatyn otbasy músheleri ornalasa alatyn 11 jaıly oryn jáne tikeleı fermalardan jetkiziletin tabıǵı ónimderden jasalatyn taǵamdar usynylady. Sondaı-aq demalýshylar óz ýaqyttaryn kóńildi ótkize alady. Demalys aımaǵynyń kesheninde qonaqtarǵa arnalǵan meımanhana, kıiz úı, balalarǵa jáne úlkenderge arnalǵan basseın, monsha, sporttyq alańdar jáne tegin kólik turaǵy qarastyrylǵan.
Demalýshylar atqa minip saıahattap, kvadrosıkl, velosıped teýip, serýendeı alady. Sondaı-aq Jókeı kóliniń jaǵasynda balyq aýlap, tabıǵat aıasynda demalady. Birjan sal aýdanynyń kásipkerlik jáne ónerkásip bóliminiń bas mamany Maral Shaýjanova óńirde glempıngti iske qosý ekologııalyq týrızmdi damytýdaǵy mańyzdy qadam ekenin atap ótti.
«Glempıng – turmysqa qajetti zamanaýı zattarmen jabdyqtalǵan jaıly oryndar quryp, tabıǵatta demalǵandy jón kóretin jandarǵa arnalǵan demalys orny. Tabıǵaty ásem, taza aýa ári syńǵyrlaǵan qustardyń daýsy bar bizdiń óńirge keletin demalýshylar sany odan saıyn arta túserine senim mol», dedi M. Shaýjanova.
Aıta keteıik, BUU-nyń Búkilálemdik týrıstik uıymy aýyldyq jáne ekologııalyq týrızmdi damytýdy atap ótken. Sebebi pandemııa áserinen ekotýrızm jahandyq týrızm úlesiniń 30%-yn quraǵan.