Premer-Mınıstr Asqar Mamınniń tóraǵalyǵymen ótken Úkimet otyrysynda balalardyń quqyqtaryn qorǵaý jáne qaýipsizdigin qamtamasyz etý jónindegi sharalar qaraldy, dep habarlaıdy Egemen.kz.
Bilim jáne ǵylym mınıstri Ashat Aımaǵambetov, densaýlyq saqtaý mınıstri Alekseı Soı, ishki ister mınıstri Erlan Turǵymbaev, sondaı-aq IýNISEF ókildiginiń basshysy Artýr van Dızen baıandama jasady.
2020 jyly Qazaqstanda balalardyń quqyqtaryn qorǵaý salasynda 22 normatıvtik quqyqtyq akt ázirlenip, qabyldandy. Bala quqyqtaryn qorǵaýdy kúsheıtý, turmystyq zorlyq-zombylyqqa qarsy is-qımyl jáne jasóspirimder arasynda sýısıd máselelerin sheshý jónindegi 2020-2023 jyldarǵa arnalǵan jol kartasy bekitildi. Terrorıstik áreketten zardap shekken balalardy áleýmettik ońaltý qaǵıdalary men merzimderi qabyldandy.
2022 jyly balalardyń qaýipsizdigin, densaýlyǵyn, bilim alýyn, materıaldyq ál-aýqatyn, áleýmettenýin qamtıtyn balalar ıgiliginiń qazaqstandyq ındeksin engizý josparlanýda. Osy ındekstiń kómegimen balalardyń jaǵdaıyn jaqsartý boıynsha memlekettik organdar jumysynyń nátıjeliligi qadaǵalanatyn bolady.
Úkimet basshysy kóshede, bilim berý uıymdarynda, demalys kezinde balalardyń qaýipsizdigin qamtamasyz etýdiń mańyzdylyǵyn atap ótti.
Osyǵan baılanysty A. Mamın eki apta ishinde bilim berý jáne bos ýaqytty ótkizý salasynyń obektilerin tıisti qaýipsizdik ınfraqurylymymen qamtamasyz etý jónindegi jol kartasyn daıyndaýdy tapsyrdy.