Indýstrııa jáne ınfraqurylymdyq damý mınıstri Beıbit Atamqulov aqyly joldarǵa jańa tarıf engizilmeıtinin aıtty, dep habarlaıdy Egemen.kz.
Sondaı-aq jóndelmegen joldar aqyly bolmaıdy. Mınıstrliktiń resmı deregi boıynsha, qazir eldegi aqyly joldarda jeńil avtomobıl úshin bir shaqyrymdyq tarıf – 1 teńge. Al avtobýstar úshin ondaǵy oryndyq sanyna baılanysty bir shaqyrymǵa 5-15 teńge aralyǵynda. Aýyr júk kólik ıeleri bir shaqyrymǵa 5 teńgeden 25 teńgege deıin tóleıdi.
Aıta keteıik, elimizde respýblıkalyq mańyzy bar joldardyń jalpy uzyndyǵy – 25 myń shaqyrym. Kútip ustaýǵa jyl saıyn 40 mlrd tg jumsalady.
«Kórshi elderde aqyly júıe burynnan bar. Ondaǵy tarıftik mólsherlemeler bizdiń eldegi kórsetkishpen salystyrǵanda áldeqaıda joǵary. Salystyryp qaraıtyn bolsaq, Reseı Federasııasynda júk kólikteri 1 shaqyrym úshin 22 teńge tóleıdi. Italııa men Germanııada orta eseppen alǵanda – 70 teńge. Belarýs Respýblıkasynda – 80 tg, al Horvatııada júk kóligi úshin jolda júrý 122 teńgeni quraıdy», deıdi Atamqulov.
Qazaq jol ǵylymı-zertteý ınstıtýtynyń mamandary aýyr júk kólikteri úshin tarıfti 38 teńgege deıin kóterýdi usynǵan bolatyn. Biraq mınıstrlik pen salalyq vedomstvo bul usynysty bekitken joq.
«Qazir 2013 jylǵy tarıf qoldanylyp otyr», deıdi vedomstvo basshysy.
2025 jylǵa deıin avtojoldardyń 11 myń shaqyrymyna aqyly júıeni engizý josparlanǵan.