Pandemııa yzǵary byltyrǵydaı emes. Dese de qaýip bulty birjola seıildi deýge erte. Bıylǵa boljam jasap, keler jyly bolýy múmkin keıbir faktorlarǵa kóz júgirtken Ekonomıkalyq yntymaqtastyq jáne damý uıymy endigi ahýaldyń qalaı bolary vaksınalaýǵa baılanysty degen baılam jasady.
Keıbir elderde jaǵdaıdyń birtindep ońalyp kele jatqany belgili. Uıymnyń boljaýynsha, Ońtústik Koreıa men AQSh jan basyna shaqqandaǵy tabystyń pandemııaǵa deıingi deńgeıine 18 aıdan keıin jetpek. Iаǵnı bir jarym jyldan soń. Kári qurlyqtyń kóp eline tolyq qalpyna kelý úshin 3 jyldaı ýaqyt qajet kórinedi. Bul jaǵdaı Meksıka men Ońtústik Afrıkada 3 jyldan 5 jylǵa deıin sozylýy múmkin.
«Bıyl álemdik ekonomıkalyq ósim 5,8 paıyzdy quraıdy dep kútiledi. 2022 jyly álemdik IJО́ ósimi 4,4 paıyzǵa jetedi. Biraq 2022 jyldyń sońyna qaraı dúnıejúzilik kiris daǵdarysqa deıingi kútilimnen shamamen 3 trln dollarǵa az bolady. Halqyn COVID-19-ǵa qarsy jedel vaksınalaǵan jáne ınfeksııamen kúreste tıimdi strategııa qura alǵan elderde ekonomıka jyldam qalpyna keledi. Mysaly, AQSh-ta jumysqa usynys sany ósip jatyr, ásirese týrızm salasynda. Ekonomıkasy jaqsy damyǵan kóptegen elde ımmýndalý deńgeıi de ósim kórsetýde. Biraq kedeı jáne naryqtyq ekonomıkaǵa súıengen memleketter artta qalyp jatyr» delinedi uıym habarlamasynda.
«Biz álemdik óndiris bıyl 6 paıyzǵa ulǵaıady dep boljaımyz. Kóptegen elde IJО́ 2022 jyldyń aıaǵynda ǵana pandemııaǵa deıingi deńgeıge orala alady, biraq bul jetkiliksiz. Jahandyq ekonomıkanyń ósim traektorııasy áli tómen kúıinde qalyp otyr. Damýshy elderde vaksına kólemi áli de jetkiliksiz. Vaksınanyń bolmaýy bul elderdiń ekonomıkasy úshin úlken qaýip týdyrady. Inflıasııanyń, shıkizat baǵasynyń ósýi jáne saýda-sattyq salasyndaǵy qıyndyqtar baǵa qysymyna ákelip soqtyrýda. Tek on alty aıdan soń ǵana birqatar el indettiń taralýymen qarqyndy kúrese bastaıdy. Qazirdiń ózinde memleketter vaksınanyń 2 mlrd dozasyn qoldanysqa engizdi, skrınıng boıynsha da áleýet artyp keledi. Memlekettik organdardyń buryn-sońdy bolmaǵan qoldaý sharalary ekonomıkanyń qurylymyn, kásiporyndar men jumys oryndaryn saqtaýǵa kómektesti. Daǵdarys tarıhyna qarasaq, úkimettiń aralasýy qazirgideı sonshalyqty tez jáne tıimdi bolǵan emes. Qabyldanǵan sharalardyń nátıjesinde óńdeýshi sektordyń aıasy keńeıip jatyr», deıdi uıymnyń bas ekonomısi Loýrens Býn.