Jambyl oblysynyń dárigerleri óńirde alǵash ret «Osteosarkoma» qaterli isigine kúrdeli operasııa jasady.
Taraz qalasynyń 23 jastaǵy turǵyny aýrýy janyna batyp, bir aptadaı aıaǵynan júre almaı qalady. Jambyl oblystyq kópbeıindi aýrýhanasynyń onkologııalyq qurylymyna júgingen oǵan medısınalyq tekseris jasalyp, san súıeginde qaterli isiktiń bary anyqtalady. «Osteosarkoma» dep atalatyn bul qaterli isik súıek tininen paıda bolady jáne súıekterde kezdesetin qaterli prosess.
Mundaı jaǵdaıda ýaqyt ótkizbeı shuǵyl túrde hırýrgııalyq operasııa arqyly isikti alyp tastaý qajet. Jambyl oblysynda mundaı ota túri buryn-sońdy jasalmaǵan. Bul úshin naýqastar Almaty nemese Nur-Sultan qalalaryndaǵy arnaıy ortalyqtarǵa jiberiletin.
Jergilikti dárigerler ózara keńese kele, biraýyzdan ota jasaýdy uıǵarady. 2 saǵattan astam ýaqytqa sozylǵan kúrdeli ota túrine hırýrgtar men onkologtar baryn saldy. Sátti jasalǵan otadan soń naýqas jansaqtaý bólimine, keıinirek palataǵa aýystyrylǵan.
«Densaýlyǵym jaqsy. Qazir esh jerim aýyrmaıdy, súıemeldese jaılap júre alamyn. Meni aıaqqa turǵyzǵan dárigerlerge alǵysym sheksiz. Endi aldaǵy ýaqytta qaıtadan sportpen aınalysa alatyn boldym. Qýanyshymda shek joq», deıdi 23 jasar tarazdyq turǵyn.
Mamandardyń pikirinshe, bul – óte sırek kezdesetin kesel. Medısına tilimen aıtqanda, sarkomaǵa ýaqtyly operasııa jasamasa, keıin kesh bolady. Mundaı jaǵdaıda jigittiń aıaǵyn kesýge týra keletin edi. Onkohırýrgter qaterli isikti alyp qana qoımaı, endoprotez ımplantasııasyn da qoıdy. Endi ol tize býyny qyzmetin atqarady.
«Buryn mundaı dıagnoz qoıylǵan naýqas úshin bizdiń medısına dármensiz bolatyn, al qazir isik jaıylyp ketse de kúrese alatyn jaǵdaıǵa jettik. Endi pasıent ári qaraı hımııa, sáýle terapııalaryn alyp, emdele alady. Biz jańa tehnologııalardyń kómegi men zamanaýı qondyrǵylardyń kómegimen naýqastyń aıaǵyn saqtap qaldyq. Endi ońaltý sharalarynan keıin pasıentimiz tolyqqandy ómirge oralady», deıdi onkologııalyq qurylymnyń onkohırýrgi Jandos Seıdahmetov.
Aldaǵy ýaqytta Jambyl oblystyq kópbeıindi aýrýhanasynyń onkologııalyq qurylymynda mundaı ota túri jasalatyn boldy.
Jambyl oblysy