SQO Beskól kentinde kútpegen tótenshe oqıǵa oryn aldy, dep habarlaıdy Egemen.kz.
Soltústik Qazaqstan oblysyndaǵy Beskól kenti oblys ortalyǵynan on shaqyrym jerde ǵana ornalasqan úlken eldimeken. Ol Qyzyljar aýdanynyń ákimshilik ortalyǵy. Qyzyljarǵa jaqyn bolǵandyqtan basqa aýdan ortalyqtarymen salystyrǵanda ınfraqurylymy birshama joǵary damyǵan. Qoly uzyn qyzyljarlyqtardyń birazy munda jer úıler, birazy kottedjder de turǵyzyp alǵan. Mine, osy mekende jýyrda kútpegen tótenshe oqıǵa oryn aldy.
Aýdandyq sanıtarlyq-epıdemıologııalyq baqylaý basqarmasynyń basshysy Jangeldi Ybyraevtyń aıtýyna qaraǵanda osyndaǵy aýdandyq aýrýhanaǵa sońǵy málimetterge qaraǵanda 105 adam júregi aınyp qusýdan, temperatýrasy kóterilip, ishi ótýden shaǵymdanǵan. Aldyn ala jasalǵan dıagnoz: «Anyqtalmaǵan enterovırýstyq ınfeksııa».
Sanıtarlyq-epıdemıologııalyq qyzmet mamandarynyń tekserýine qaraǵanda qater Esil ózeninen alynatyn aýyz sýdyń ýlanǵanynan kelgen dep boljanyp otyr. Aýyrǵan adamdardyń úıinen alynǵan ishetin sýlar sarapqa salynǵanda olardyń bakterologııalyq kórsetkishteri normadan joǵary dep tanylǵan. Demek aýrý ishetin sýdan kelgen degen qorytyndy jasalyp, qazir arnaıy eksperttik sarap taǵaıyndaldy.
Sońǵy kezge deıin bolǵan ystyqta halyq jappaı sýǵa túsip, ózenniń sýyna túrli vırýstar túsken bolýy kerek. Osyǵan qarsy epıdemııaǵa qarsy sharalar belgilenip, ony júzege asyrý da qarastyrylýda.
Keshe aýrýhanaǵa 18 adam túsken. Onyń 17 balalar. Qazir olardyń jaǵdaılary birqalypty, em-dom sharalary qoldanylýda. Epıdemııanyń shekten shyǵyp, adam shyǵynyna soqtyrǵan jaǵdaıy joq. Biraq oǵan qaramaı epıdemıologııalyq qyzmet halyqty saq bolýǵa shaqyryp otyr. Sonyń ishinde aýyz sýdy tek qana qaınatyp ishýge keńes berilgen. Sonymen birge tek tetrapaket ydystardaǵy sýdy qoldaný usynylǵan.
Sońǵy eki kúndegi kúrt túsken salqyndyq halyqty sýdyń jaǵasynan bir-aq kúnde joq qylǵan. Áıtse de kún qaıta jylt etse sýǵa júgirýge daıyn otyrǵan bala-shaǵany da eskertip, tek ruqsat etilgen jerlerde sýǵa túsý talap etildi.