Jezqazǵan-Qaraǵandy tas jolynda motosıkl men jeńil kólik soqtyǵysty. Jol apaty saldarynan motoksıklde otyrǵan 11 jastaǵy bala kóz jumdy, dep habarlaıdy Egemen.kz.
5 maýsymda Jezqazǵan-Qaraǵandy tas jolynda 14 jasar jasóspirimniń júrgizgen «Voshod» motosıkl men Toyota Camry avtokóligie soqtyǵysqan. Jol-kólik oqıǵasy saldarynan motosıklde otyrǵan 11 jastaǵy bala qaıtys boldy.
Al, motosıkl júrgizýshisi ártúrli dene jaraqatymen aýrýhanaǵa jetkizildi.
Atalǵan fakti boıynsha Qylmystyq kodekstiń 345-baby 3-tarmaǵyna sáıkes qylmystyq is qozǵaldy. Tıisti saraptamalar taǵaıyndalyp, tergeý amaldary júrgizilip jatyr. «Skýter, moped jáne motosıkl qazirgi ýaqytta kámelet jasqa tolmaǵandar arasynda erekshe qyzyǵýshylyq týdyratyn kólik quralynyń biri. Olar atalǵan kólikti júrgizgende qaýipti jaǵdaı týraly oaılamaıdy.
Kámeletke tolmaǵandardyń qaýipsizdigin ata-analary da baqylaýda ustamaıdy. Olar balalardyń jasyna jáne kólikti júrgizý tájirıbesine de mán bermeıdi. Eger, balalaryńyzǵa zamanaýı kólik quralyn satyp ápergilerińiz kelse, olardyń 16 jasqa tolǵanyn kútińiz. Sondaı-aq, balalardyń qaýipsizdigi men kólikke minerdegi qajetti jabdyqtarmen qamtamasyz etińizder. Eń bastysy balalaryńyzdyń júrgizý tájirıbesimen jáne júrgizýshi kýáliginiń bolýyn qamtamasyz etý qajet», dedi Qaraǵandy oblystyq Polısııa departamentiniń bastyǵy Erlan Faızýllın.