Túrkistan oblysy Shardara aýdanynda balbal tas tabyldy, dep habarlaıdy Egemen.kz.
Jergilikti tarıhshylar kóne jádigerdi ejelgi túrki dáýirine tıesili dep otyr. Abaı – Shardara tasjolynyń boıyndaǵy «Shekertóbe» egistik alqabynan tabylǵan tas ataqty qolbasshyǵa arnap jasalǵan sııaqty. О́ıtkeni betinde áskerı bas kıim anyq beınelengen.
Kóne jádigerdi tapqan Núrken Tórebekov ony ornyna qaıta qoıyp, arnaıy qorshaý jasatqan. Mundaı jádiger Shardara óńirinde alǵash ret tabylyp otyr.
«Osy jerde qoı aıdap bara jatqan kezde jerde jatyr eken, baıqap qaldym. Kitaptardan, teledıdardan kórgenbiz ǵoı. Ne eken dep túrtip, aýdaryp tastadym. Qarasam, kózderi, sulbasy kórindi», dedi Shardara aýdanynyń turǵyny Núrken Tórebekov.
«Shardara aýdany aýmaǵynda ornalasqan óte kóne tarıhı nysan. Tarıhı oryn. Túrkilirdiń ǵundar jaýyngeriniń músini sonyń qurmetine arnaıy daıyndalǵan músin dep oılaımyn», deıdi aýdandyq tarıhı-ólketaný mýzeıiniń meńgerýshisi Nurlan Smaıylov.