Osydan týra 4 jyl buryn – 2017 jylǵy 10 maýsymda elordada EXPO-2017 Astana halyqaralyq mamandandyrylǵan kórmesi ashylǵan bolatyn. EXPO tek tarıh qoınaýyna ketken eleýli bir kezeń ǵana emes, búginde jumysyn sátti jalǵastyryp jatqan ortalyq, dep habarlaıdy Egemen.kz
«EXPO-2017» kórmesi – Táýelsiz Qazaqstan tarıhyndaǵy eń mańyzdy ári el abyroıyn asqaqtatqan aıryqsha jetistikterdiń biri boldy. «Bolashaq energııasy» taqyrybynda ótken kórme – jalpy EXPO tarıhyndaǵy eń sátti ótken mamandandyrylǵan kórmelerdiń biri.
2017 jylǵy 10 qyrkúıekte «EXPO-2017»-niń jabylý saltanatynda Qazaqstannyń Tuńǵysh Prezıdenti – Elbasy N.Nazarbaev kórme elimizdiń ekonomıkasynyń odan ári damýyna serpin bergenin atap ótti. Saralap qarasańyz, kórmeni ótkizýdegi túpki maqsat oryndaldy, elimizdiń álemdik arenadaǵy ımıdji nyǵaıa tústi jáne kórme ulttyq brend qalyptastyrdy. Kórmeniń aıaqtalýy basqa da jańa jobalardyń bastalýyna sebep boldy. EXPO alańyndaǵy kórme nysandary ári qaraı qyzmetin jalǵastyra berdi.
Kórme aıaqtalǵan soń Moskva-sıtı (Máskeý), La Défense (Parıj), Canary Wharf (London) jáne Downtown Core (Sıngapýr) sııaqty álemniń jetekshi iskerlik ortalyqtardyń úlgisi boıynsha nysandardy kórmeden keıin paıdalaný tujyrymdamasy ázirlenip, bekitildi. Negizi EXPO aýmaǵyndaǵy resýrstar kórmeden soń el men halyqqa paıdaly bolý jaǵy kórme ınfraqurylymyn jobalaý kezeńinde-aq qamtylǵan bolatyn. Bul maqsatta keshen aýmaǵynda serpindi jobalardy iske asyrý úshin jańa ınnovasııalyq ekojúıe qalyptastyryldy.
Búginde «QazExpoCongress» Ulttyq kompanııasynyń strategııasyna sáıkes kompanııa birtindep óz shyǵynyn ózi óteıtin bolady. Buǵan nysandardy kommersııalandyrý, kórme is-sharalaryn ótkizý jáne paıdalaný shyǵyndaryn qysqartý arqyly qol jetkiziledi.
EXPO kórmesi arqyly elimizde iskerlik ekojúıe qalyptasty. Búginde EXPO aýmaǵy «Astana» halyqaralyq qarjy ortalyǵy, Halyqaralyq jasyl tehnologııalar jáne ınvestısııalyq jobalar ortalyǵy, «Astana Hub» IT-startaptar halyqaralyq tehnoparki jáne Astana IT University sııaqty ınnovasııalyq jobalar shoǵyrlanǵan elordanyń iskerlik ortalyǵyna aınaldy. EXPO kesheni ǵylym, aqparattyq tehnologııa men ekonomıkany damytýdyń ortalyǵy ǵana emes, sonymen qatar oıyn-saýyq ındýstrııasyna aınaldy. NUR ALEM bolashaq energııasy murajaıy jáne Kongress ortalyǵy mańyzdy ǵylymı jáne mádenı mura bolyp, sońǵy 4 jyl ishinde el men elorda halqy úshin eń jarqyn jáne mańyzdy is-sharalar ótetin orynǵa aınaldy.
Bıyl EXPO halyqaralyq kórme ortalyǵynda Automechanika Astana, ULTTYQ ÓNIM, KIOSH-2021, IndustryWeek syndy iri halyqaralyq is-sharalardy ótkizý josparlanyp otyr. Sondaı-aq «Smart City Expo Nur-Sultan» aqyldy qalalardyń halyqaralyq IT-kongresin ótkizý josparda bar.
EXPO-2017 Astana kórmesi bir mezettik, jylt etken oqıǵa emes, ómirsheń joba ekenin ýaqyttyń ózi dáleldedi. Ol tarıhty, búgin men bolashaqty baılanystyratyn ortalyqqa aınaldy. Búginde EXPO kesheni tyń ıdeıalar men ınvestısııalardy, sondaı-aq elimizdiń aqyldy adamdaryn bir jerge shoǵyrlandyratyn, elorda qonaqtary men turǵyndaryn qýantatyn ózindik ómir yrǵaǵy men erekshe rýhy bar ekojúıege aınaldy.
EXPO aıasynda Qazaqstan Dýbaıda ótetin Dúnıejúzilik EXPO-2020 kórmesine oraı elge paıdaly bolatyn qundy tájirıbege ıe boldy. Qazaqstan Dýbaıǵa EXPO-2017 Astana kórmesinde Halyqaralyq kórmeler bıýrosynyń týyn tabys etken bolatyn. Qazaqstan 2021 jylǵy 1 qazannan 2022 jylǵy 31 naýryzǵa deıin ótetin is-sharaǵa qatysýǵa belsendi daıyndalýda. «Aqyl-oıdy biriktirip, bolashaqty qurý» uranymen ótetin kórmege bizdiń elimiz baı tarıhy men mádenıetin, sondaı-aq eldiń týrıstik áleýetin, tehnologııalyq jáne ınvestısııalyq múmkindikterin usynady.