Jańa deklarasııa boıynsha Baký men Ankara táýelsiz eki el tutastyǵyna úshinshi memleket tarapynan qaýip tónse nemese shabýyl jasalǵan jaǵdaıda bir-birine kómektesedi, dep jazady Egemen.kz Anadoly agenttigine silteme jasap.
Bul týraly seısenbide Armenııa okkýpasııasynan bosatylǵan Shýsha qalasynda Túrkııa men Ázirbaıjan prezıdentteri Redjep Taııp Erdoǵan men Ilham Alıev qol qoıǵan birlesken odaqtastyq deklarasııasynda aıtylǵan.
Túrkııa men Ázirbaıjannyń qaýipsizdik keńesteri ulttyq qaýipsizdik máseleleri boıynsha júıeli túrde birlesken otyrystar ótkizedi.
«Ázirbaıjan Túrkııanyń Armenııa eliniń 30 jyldyq agressııasyn toqtatý jáne basyp alǵan jerlerdi azat etý máselesindegi qoldaýyn joǵary baǵalaıdy», delingen qujat mátininde.
Taraptar túrik-ázirbaıjan qatynastaryn odan ári keńeıtý men tereńdetýdiń barlyq perspektıvalaryn zerttedi, delingen deklarasııada.
Qujatta Túrkııa men Ázirbaıjannyń aımaqtyq jáne jahandyq qaýipsizdik pen turaqtylyq máselelerin sheshýge birlesken kúsh-jiger jumsap jatqany basa aıtylǵan.
Sondaı-aq Túrkııa men Ázirbaıjan arasyndaǵy Zangezýr dáliziniń jáne Nahchyvan-Kars temirjol jelisiniń ashylýy eki el arasyndaǵy qatynastardyń damýyna yqpal etetindigi atap ótildi.
Degenmen Túrkııa men Ázirbaıjan arasyndaǵy áskerı-saıası yntymaqtastyq úshinshi memleketterge qarsy baǵyttalmaǵan.
Shýsha deklarasııada taraptar terrorızmge, uıymdasqan qylmysqa, esirtki kontrabandasyna, zańsyz kóshi-qonǵa qarsy kúreste birlesken kúsh-jiger men yntymaqtastyqty keńeıtetini de atap ótildi.