Nur-Sultan qalasyndaǵy Dostyq úıinde Qazaqstan halqy Assambleıasynyń respýblıkalyq Analar keńesiniń keńeıtilgen otyrysy ótti. Jıynǵa qatysýshylar eldegi birlik pen kelisimdi nyǵaıtýdaǵy, azamattyq jáne otbasylyq qundylyqtardy, ulttyq dástúrlerdi damytýdaǵy, memlekettik tildi ilgeriletýdegi Analar keńesteriniń rólin talqylady.
– 2014 jyldan beri Qazaqstan halqy Assambleıasynyń qurylymy retinde jumys istep kele jatqan Analar keńesi osy ýaqyt aralyǵynda óz tıimdiligin dáleldedi. Alaıda ýaqyt pen zaman talabyna saı qoǵamda jańa máseleler týyndap, aldymyzǵa jańa mindetter qoıylyp otyr. О́z jumysyn qoǵamnyń tynysymen sáıkestendirip otyrǵan qurylym retinde Analar keńesi ótken jyldan beri jalpy adamzattyq problemaǵa aınalǵan pandemııaǵa baılanysty óz jumys baǵytyna qajetti ózgerister engizdi. Sondyqtan búgingi basqosýymyz aldaǵy jumys baǵytymyzdy anyqtap, josparlarymyzdy naqtylap alýǵa arnalǵan, – dedi qoǵam qaıratkeri, is-shara moderatory Názıpa Shanaı.
Onyń aıtýynsha, keńestiń túpki maqsaty – otbasylyq qundylyqtardy saqtaý, damytý jáne nyǵaıtý sanalady. Bul – rýhanı-adamgershilik, mádenı jáne tárbıelik máni bar jumys.
– Analar keńesi urpaqtar sabaqtastyǵyn, ulttyq dástúrler men otbasylyq qundylyqtardy nyǵaıtý men saqtaýǵa ózindik úlesin qosyp keledi. Sondaı-aq bul keńes qazaqstandyq patrıotızmdi, toleranttylyqty jáne etnosaralyq kelisimdi iske asyrýǵa tyń serpin beredi. Osy keńeste ulttyq jáne otbasy qundylyqtaryn dáripteý, jastardy otansúıgishtikke tárbıeleý, eldiń birligi men kelisimin saqtaı bilý syndy birqatar negizgi máseleler qaralady. Keńes qurylǵan sátten bastap otbasy mártebesin kóterý, otbasy qundylyǵyn arttyrý, otbasylyq tárbıe, ajyrasýdyń, quqyq buzýshylyqtyń aldyn alý sııaqty máseleler jóninde is-sharalar uıymdastyrý boıynsha birqatar aýqymdy bastamalar kóterildi, – dedi Aqparat jáne qoǵamdyq damý vıse-mınıstri Serik Egizbaev.
Búginde Qazaqstan halqy Assambleıasynda 11 myńnan astam adamnyń basyn biriktirip otyrǵan 1 795 Analar keńesi jumys isteıdi. Olardyń basym bóligi etnomádenı birlestikterdiń basshylary, mádenıet jáne bilim berý mekemeleriniń, úkimettik emes sektordyń, psıhologııalyq-medısınalyq mekemelerdiń ókilderi, áıelder qoǵamdyq uıymdarynyń belsendileri, medıatorlar.
– Búginde qoǵamdaǵy áıel men erdiń orny týraly túsinikter men kózqarastar, stereotıpter men áleýmettik úrdister erekshe ózekti máselege aınalyp otyr. Sebebi osy kúni beıbitshilik pen turaqtylyqty qamtamasyz etý úshin zorlyq-zombylyqsyz ómir súrýdiń joldaryn izdeý asa mańyzdy. Osyndaı jaǵdaıda gender máselesin dástúrli dúnıetanym sheńberinde qarastyrýdyń qajettiligi týyndaıdy. Sebebi er men áıeldiń qoǵamdyq róli jaıly uǵym men ustanym urpaqtan- urpaqqa dástúr boıynsha jalǵasyp kele jatqan, tamyry tereńge ketken túsinikter negizinde qalyptasady. Bul túsinikter qoǵam damýynyń uzaq tarıhy boıynda damyp otyrady jáne onyń tarıhı, ekonomıkalyq, saıası, psıhologııalyq jáne dinı qyrlary bar, – dedi Májilis depýtaty Natalıa Dementeva.
Jıyn barysynda Qazaqstan halqy Assambleıasynyń aldynda turǵan jańa mindetter aıasynda Analar keńesin odan ári damytý sharalary aıqyndalyp, ortaǵa oramdy oı tastaldy.
– Analar keńesi – bul bizdiń jastarymyzdy áleýmettendirýdiń basty ári tıimdi ınstıtýty. Qoǵamdyq qundylyqtar, patrıotızm men biregeılik balalarymyzdyń boıynda otbasy arqyly qalyptasady. Sol otbasynda biz alǵashqy ári ómirlik tárbıeni anamyzdan alamyz. Sondyqtan Analar keńesiniń ıdeologııalyq róli asa mańyzdy. Adam balasynyń boıyndaǵy barlyq qasıetterdiń negizi otbasynda qalanyp, onyń búkil ǵumyrynyń arqaýy bolatyny anyq. Bul rette, Analar keńesiniń otbasylyq qundylyqtardy dáripteý, berik otbasylyq qatynastardy qalyptastyrý baǵytyndaǵy jumysy búgingiden de jaqsaryp, jańa sapalyq deńgeıge kóterilýi tıis, – dedi Qazaqstan halqy Assambleıasy Tóraǵasynyń orynbasary Marat Ázilhanov.
Onyń aıtýynsha, Analar keńesi balalardyń boıynda qazaq halqynyń, memlekettik tildiń toptastyrýshy róli týraly túsinik qalyptastyrýǵa, ult qundylyqtarynyń negizi retinde etnosaralyq qatynastar salasyndaǵy memlekettik saıasat qaǵıdattaryn ilgeriletýi tıis. Sondaı-aq Assambleıanyń Analar keńesi belsendi jas analar úshin naǵyz áleýmettik lıft bolýy tıis.