Májilis depýtaty Aıqyn Qońyrov qazaqstandyqtarǵa jeke turǵyn úı qurylysyn damytýǵa baǵyttalǵan baǵdarlama keregin aıtty, dep habarlaıdy Egemen.kz.
Partııa ókilderi premer-mınıstrdiń orynbasary Roman Sklıarǵa depýtattyq saýal joldady. Májilismenderdiń pikirinshe, eldegi turǵyn úı jaǵdaıyn jaqsartý úshin zeınetaqy jınaǵyn paıdalaný jónindegi jobanyń aralyq nátıjesin qorytyndylaý qajet.
«313 myńnan asa azamattyń arnaıy shotyna 1 trıllıon 400 mıllıard teńgeden asa qarajat aýdaryldy. Olardyń bári zeınetaqy jınaǵynan paıda kórdi. Bul joba búkil ekonomıkaǵa áser etti. Osy turǵydan alǵanda, ekonomıkalyq paıda kóbine eki megapolıstegi qurylys salýshylar, bankter men ımporttaýshylarǵa túskenin kórip otyrmyz. Biraq halyqtyń turǵyn úıge qol jetkizýi áli de qıyn, bul júıelik problema sheshilmeı qaldy. Qoǵamda turǵyn úıdegi bólinis tek nasharlady», dedi Aıqyn Qońyrov Májilis otyrysynda.
Depýtattyń aıtýynsha, turǵyn úı men qurylys materıaldary baǵasynyń ósýine baılanysty jaǵymsyz janama áserler qatty yqpalyn tıgizdi. Bul ınflıasııanyń jalpy údeýine de áser etken.
Qońyrov zeınetaqy naýqany bastalǵannan beri eldegi páterlerdiń baǵasy 8,3 paıyzǵa óskenin eske saldy. 2020 jyldyń mamyrynan 2021 jyldyń mamyryna deıin ósim shamamen 22 paıyz bolǵan.
Aıqyn Qońyrovtyń sózinshe, munyń saldarynan ınflıasııa halyqtyń barlyq tobyna áser etken, al zeınetaqy jınaǵyn turǵyn úı alý úshin qoldanǵandar sany osy ýaqytqa deıin halyqtyń eki paıyzyna da jetpegen.
«Memleket áreket etedi, biraq ádettegideı keshigip qalady. Monopolııaǵa qarsy agenttik baǵalardy retteýge tyrysyp jatyr, biraq BJZQ-dan alynǵan qarajattyń taýsylýyna baılanysty baǵanyń ósýi tabıǵı túrde baıaýlap keledi. Osylaısha, turǵyn úı jaǵdaıyn jaqsartý úshin zeınetaqy jınaǵyn paıdalaný jónindegi jobany jalǵastyra otyryp, ekinshi kezeńde qosymsha júıeli sharalar qosý mańyzdy dep sanaımyz. Bul sharalar jeke toptarǵa emes, búkil qoǵamǵa arnalýy kerek. Sharshy metrdi jalpy paıdalanýǵa berý tıimdilikti baǵalaý krıterııi retinde eskirgen jáne shyndyqty kórsetpeıdi. Bul «ınvestısııalyq kópirshik» alyp keldi jáne kóptegen azamattyń turǵyn úı máselesin sheshpeıdi», dedi depýtat.
Qazaqstan Halyq partııasynyń fraksııasy depýtattyq saýalynda «memleket qazaqstandyqtardyń basym kópshiligin sapaly jáne qoljetimdi turǵyn úımen qamtamasyz etýdi basty másele qylýy tıis» degen pikir bildirdi.
«Bizdiń azamattarymyzǵa jeke turǵyn úı qurylysyn damytýǵa baǵyttalǵan «Jer úı» baǵdarlamasy qajet. «Qazaqstannyń Halyq partııasy» fraksııasy Úkimetke JTQ úshin jer ýchaskelerin ınfraqurylymmen qamtamasyz etý úshin oıǵa qonymdy qural - memleket kepildik beretin oblıgasııalar shyǵarý jáne oǵan BJZQ qarajatyn ınvestısııalaýdy usynady. Bul kóptegen qazaqstandyqtyń óz úıin salý úshin jer ýchaskelerine quqyǵy men armanyn iske asyrýǵa, ınfraqurylymy bar aýmaqtar joq degen problemany sheshýge jáne eń bastysy, turǵyn úı salasyndaǵy jaǵdaıdy túbegeıli ózgertýge múmkindik beredi. «Jer úı» JTQ damytý baǵdarlamasymen birge qajetti qurylys jáne árleý materıaldarynyń, ilespe taýarlar men kórsetiletin qyzmetterdiń otandyq óndirisin damytý jónindegi sharalar atqarylýy kerek», dep usyndy Aıqyn Qońyrov.