Qazaqkuresi qaýymdastyǵynyń sportty damytý jónindegi dırektory Baqdáýlet Sábıtov Ortalyq kommýnıkasııalar qyzmetinde brıfıng ótkizdi, dep habarlaıdy Egemen.kz.
Onyń aıtýynsha, osy jyldar arasynda jobaǵa aýyl, aýdan, oblys deńgeıinde 100 myńnan astam balýan qatysqan. Ár jyly týrnırdi 9 myńnan astam jankúıer, 8 mln astam kórermen tamashalaıdy.
«Joba aıasynda qazaq kúresine, sportshylarǵa degen memlekettik qoldaý joǵary deńgeıde kórsetiledi. Balýandarǵa aqshalaı syılyqtar, altyn belbeý, kólikter tabystaldy. Halyq qoldaýyna ıe bolǵan jobany 2015 jyly Elbasy N.Á.Nazarbaev kelip tamashalap, balýandardy marapattaǵan bolatyn. Al, 2019 jyly QR Prezıdenti Q.K.Toqaev myrza qatysyp, ulttyq kúreske úlken qoldaý bildirdi. «Qazaqstan Barysy» týrnırin keńinen nasıhattaý nátıjesinde ulttyq kúreske qyzyǵýshylar qatary ósip keledi. Mádenıet jáne sport mınıstrliginiń resmı statıstıkasyna sáıkes, qazirgi tańda elimizde 130 myńnan astam adam qazaq kúresimen aınalysady. Bul jekpe-jek sport túrlerindegi eń joǵary nátıje. Bul da úlken jumystyń nátıjesi», dedi B.Sábıtov.
Bıylǵy mereıli onynshy týrnır el táýelsizdiginiń 30 jyldyǵy men Qajymuqan Muńaıtpasulynyń 150 jyldyq mereıtoıyna arnalyp otyr. Irikteýden ótken 37 balýan tereńdetilgen medısınalyq tekserýden ótip, dopıng synamasyn tapsyrdy.
Bıyl týrnır Qazaq kuresi Assosıasııasy bekitken erejege sáıkes ótkiziledi. Qazaq kúresiniń dınamıkasyn arttyrý maqsatynda beldesý ýaqyty qysqartyldy. Bul ózgerister osy jyl kóleminde QR chempıonattarynda synaqtan ótkizilip, oń nátıjeler kórsetti.
Sondaı-aq spıker atap ótkendeı, assosıasııanyń bastamasymen qazaq kúresiniń jańa, zamanaýı, menshikti bozkilemi qoldanysqa endi, onda balýandar jalań aıaq kúresetin bolady.
Jeńimpaz atanǵan balýanǵa dástúrli altyn belbeý men altynnan quıylǵan aýyspaly «taıtuıaq» tabystalady. Ekinshi jáne úshinshi oryn ıegerleri sáıkesinshe kúmis jáne qola belbeýlermen marapattalady. Qarjylaı júldeler: I oryn - 25 000 000, II oryn - 5 500 000, III oryn - 1 800 000 teńge.