Elorda turǵyndary vaksına alý arqyly 2 bólmeli páter utyp alýy múmkin. Mundaı jańalyqpen Nur-Sultan qalasynyń ákimi Altaı Kólginov Instagram paraqshasynda bólisti, dep habarlaıdy Egemen.kz.
«Koronavırýstyń taralýyn boldyrmaý jáne vaksınasııa júrgizý boıynsha shtab otyrysyn ótkizdim. О́z orynbasarlaryma, basqarma basshylaryna jáne aýdan ákimderine jetekshilik etetin salalarda vaksınasııalaýdyń mańyzdylyǵy men qajettiligin joǵary deńgeıde túsindirý úshin jekelegen jaýapkershilik júkteldi. Ujymdyq ımmýnıtetti qalyptastyrý úshin qala halqynyń 60 paıyzdan astamy vaksınasııalanýy qajet. Sanıtarlyq dárigerler karantındik qosymsha shekteýler týraly jańa qaýly daıyndaýda: qaýip-qater toby úshin vaksınasııa mindetti, vaksınasııalanbaǵan qyzmetkerlerdi qashyqtan jumys isteý rejımine kóshirý jáne taǵy basqa talap etiledi. Qala turǵyndaryn yntalandyrý úshin baǵaly syılyqtardyń utys oıynyn engizip jatyrmyz. Al jańadan vaksınasııalanǵandar arasynda eki bólmeli páter oınatpaqpyz (ınvestorlar esebinen). Utys oıynyna qala emhanalarynda nemese SOO/SÚ pýnktterinde ekpe alǵan qala turǵyndarynyń bári qatysa alady», dedi qala basshysy.
Onyń aıtýynsha, páter utysynyń oıynyna osy jyldyń 25 maýsymy men 31 tamyzy aralyǵynda vaksınanyń birinshi komponentin alatyn 18 jastan asqan qala turǵyndary qatysa alady. Qyrkúıek aıynyń basynda nátıjesi jarııalanady.
«Konkýrstyń ádil ótýi jáne vaksınasııalanǵandardy tolyǵymen qamtý úshin (kórsetilgen kezeńde) IT-qoǵamdastyqty jumyldyramyz. Aıta keteıin, buǵan deıin «MEGA Silk Way» SOO vaksınalanǵandar arasynda avtokólik utys oıyny ótetinin habarlaǵan. Sol sııaqty SOO/SÚ pýnktterinde vaksınasııalanǵandar arasynda kompıýterlik jáne turmystyq tehnıkalardyń, iPhone smartfonynyń utys oıyndary oınatylady. Sońǵy kúnderi turǵyndardyń vaksına alýdaǵy belsendiligi qýantady. Qala turǵyndary osylaısha óz densaýlyǵyna jaýapkershilikpen qaraı bastady ári «Delta» shtammynyń qaýpin túsindi. Vaksınasııa – pandemııamen kúrestegi jalǵyz, tıimdi ádis!», dedi Altaı Kólginov.