Eki jyl ishinde «Aýyl – el besigi» jobasymen respýblıka boıynsha 238 aýyl qamtylyp, 1,5 myń nysan salynyp, jóndeldi. Bul týraly Ortalyq kommýnıkasııalar qyzmetinde halyq aldynda esep berý kezdesýiniń qorytyndysy boıynsha ótken brıfıngte Ulttyq ekonomıka mınıstri Áset Erǵalıev málimdedi, dep habarlaıdy Egemen.kz.
«Tıisti jumystar bıyl da jalǵasyn tabady. Árbir aýylǵa arnalǵan ár joba naqty baqylaýda bolady. Atalǵan joba aıasynda ınfraqurylymdy jóndeý, tartý, áleýmettik nysandar salý maqsatynda 2025 jylǵa deıin 800 mlrd teńge baǵyttalady. Osy jobalar arqyly árbir aýyldy sapaly aýyz sýmen qamtý máselesi sheshiledi. Sondaı-aq, keń jolaqty ınternet jelisimen tolyqtaı qamtylady. Jergilikti joldardyń 95% salynyp, jóndeledi», dedi mınıstr.