О́mirimniń eń bir shýaqty da qýatty jyldaryn jýrnalıstıkaǵa arnaǵan adammyn. Osynaý qasıetti mamandyqtyń kıesin ketirmeý, tunyǵyn laılamaý azamattyq ustanymyma aınaldy. Qalam qarymymyz, jastyq jalynymyz baspasóz aıdynynda ótti. Qoǵam aınasyn aıshyqtap, kúndelikti ómir tynysyn gazet arqyly halyqqa jetkizip otyrdyq. Qolyna qalam ustaǵan ini qaryndastarymdy, balalarymdy kásibı merekesimen quttyqtaǵym keledi.
«Qazaq baspasóziniń qara shańyraǵy, bas basylym, tóre gazet, tóbe gazet, el gazeti» deımiz, qalaı aıtsaq ta, tólbasy bolǵan «Egemen Qazaqstan» – baspasózdegi alǵashqy ınstıtýtymyz. Sonaý Alash arystary dúnıege ákelgen «Qazaq» gazetiniń zańdy murageri bolǵan bul basylym shyn mánindegi jańa ádebıetimizdi órkendetýdi, týǵan tilimizdi baıytýdy, mádenıetimizdi máýelendirýdi sala-salasymen júrgizip kele jatqan bas basylym ekeninde daý joq. Asyly, ol ana tilimizdi damytý, kórkem oıymyzdy óristetý jolyndaǵy mektep boldy. Burynyraqta bir jıynda «gazettiń ózi bir kúndik, sózi myń jyldyq» dep aıtqanym bar edi. Shynynda da gazet sózi – tasqa basylǵan tarıh. Jyldardy jylǵa jalǵastyratyn shejire. Al júz jasaǵan «Egemen» – tiri tarıhymyz, ǵasyrlyq shejiremiz. Basylymnyń kótermegen taqyryby, qozǵamaǵan máselesi, barmaǵan salasy joq deýge bolady. Kóbirek oqımyn. Kóz nashar, eki kózim de áınek bolǵanymen, kúndelikti keletin poshtanyń birin qaldyrmaı, tutas qarap shyǵamyn. Respýblıkalyq gazettiń bári keledi úıge. Qalaı ony oqymaımyn? Tyń dúnıe oqyǵan saıyn buryn biletinim túkke turmaıtyndaı kórinedi. Ádette qalamger qaýymy jazýshy jáne jýrnalıst degen bir-birine tilektes, bir-birimen nıettes eki toptan turady. Jazýshy qııal saýyp, oıdan oqıǵa qurap, keıipker jasaıdy. Ekinshisi ómirde bolǵan oqıǵany baıandap, oǵan qatysty adamdardy qareket-qımylymen kórsetip, derektendirip, aqıqatyn jazady. Zaman ózgerdi, qoǵam jańǵyrdy, soǵan sáıkes jýrnalıstke degen kózqaras ta ózgerdi. Qazirgi jýrnalıst habar-oshar ǵana jazyp jurtshylyqty jańalyqtarmen ǵana tanystyryp otyratyn tilshi emes. Bıik minberlerden oı tolǵap, eldi erteńge jeteleıtin qaıratkerge, shyndyq úshin jan uryp, jar salatyn kúreskerge aınaldy. О́mirde olar aralaspaıtyn sala, olar qatyspaıtyn shara joq. Bizde osyndaı jýrnalıster ósip kele jatyr. Sondyqtan olarǵa habar-oshar tasýshy dep qaramaı, qaıratker dep qaraý kerek.Alǵashqy adymynan qazaqqa qazaq atyn qaıtaryp bergen bul gazet tól tarıhynan aıyrylyp qala jazdaǵan halqymyzdyń tarıhyn tiriltip kúreskerlik, eńbekkerlik rýhymyzdy asqaqtata túsýge tıis. Al buǵan jas qalamgerler belsene atsalysatynyna senimim kámil! Sarbas AQTAEV,jazýshy