Byltyr shilde aıynda qazaq baspasózi tarıhynyń bilgiri, jýrnalıstıka teorııasy men tájirıbesiniń tarlany, ulaǵatty ustaz, tarıh ǵylymdarynyń doktory, professor Qyryqbaı Aldabergenov dúnıeden ozdy.
Qyryqbaı aǵamyz qasıetti Baıanaýyl topyraǵynda ómirge kelgen. Jasynan jazbalary aýdandyq gazette jaryq kórip, el ishinde «tilshi bala» atandy. Orta mektepti bitirip, Otan aldyndaǵy azamattyq boryshyn ótep kelgennen keıin Baıanaýyl aýdandyq gazetinde ádebı qyzmetker, aýyl sharýashylyǵy bóliminiń meńgerýshisi jáne Pavlodar oblystyq radıosynda qyzmet isteı júrip, týǵan óńiriniń tarıhy men rýhanııaty jaıynda tyń derekter jınap, oqyrmandarǵa tanymdyq máni zor maqalalar usyndy. 1987 jyly ózi bilim alǵan Qazaq ulttyq ýnıversıtetiniń «Jýrnalıstıka tarıhy» kafedrasyna oqytýshy bolyp ornalasty. 1992 jyly UǴA korrespondent-múshesi M.X.Asylbekovtiń ǵylymı jetekshiligimen Sh.Ýálıhanov atyndaǵy tarıh jáne etnologııa ınstıtýtynyń janyndaǵy dıssertasııalyq keńeste «Otechestvennye zapıskı» jýrnaly Reseıdiń Qazaqstandaǵy otarlaý saıasaty týraly» degen taqyryptaǵy kandıdattyq dıssertasııasyn, 2001 jyly «Reseıdiń Qazaqstandaǵy otarlaý saıasatynyń baǵyttary men nátıjeleri» atty doktorlyq dıssertasııasyn sátti qorǵap shyqty.Ardaqty azamat qazaq tarıhy men jýrnalıstıkasyna qatysty oqýlyqtar, oqý quraldary men monografııalar, júzdegen ǵylymı maqala jazyp, otandyq ǵylymnyń damýyna aıtarlyqtaı úles qosty. Sonymen birge Baıanaýyldyń baı tarıhy men taǵylymdy tulǵalary týraly qundy eńbekter jazdy. L.N.Gýmılev atyndaǵy Eýrazııa ulttyq ýnıversıtetindegi Jýrnalıstıka jáne saıasattaný fakýlteti «Baspasóz jáne baspa isi» kafedrasynyń professory qyzmetin atqaryp, birneshe bilimdi shákirt tárbıelep, olardy ǵylym jolyna baýlydy. Halqymyz «Jaqsynyń aty, ǵalymnyń haty óshpeıdi» dep beker aıtpaǵan, keıingi jas urpaqqa mazmundy mura qaldyrǵan ǵıbratty ǵalymnyń aty máńgi jasaıtyny anyq.