Jetisý taýlarynyń Kerbulaq jaılaýynda qoıtastyń ústinde otyrǵan qońyr balanyń daýysy araǵa jyldar salyp keń baıtaq qazaq dalasynyń bar óńirinde jańǵyryp turaryn kim bilgen... Sol bir maıdaqońyr, tunyq, ashyq ári jumsaq daýys keıingi jyldar júzinde ár kún saıyn efırden sańqyldap estilip jatty.
Ol – qazaq telejýrnalıstıkasynda túren salǵan Beısen Quranbektiń daýysy edi. «Aıtýǵa ońaı» dep qoǵam ómiri men adam taǵdyryna arashashy bolǵan, «Qareket qylaıyq» dep qazaq balasyn qamsyz júrmeýge, qaırat qylýǵa shaqyrǵan Beısen Quranbektiń qazasy qalyń eldiń qabyrǵasyn qaıystyryp jibergenin kóz kórdi, qulaq estidi. Halyq óz balasyn uzaq joqtady. Prezıdent syılyǵynyń laýreaty, Mádenıet qaıratkeri B.Quranbek uzaq jyldar buqaralyq aqparat quraldarynda eńbek etip, azamattyq ustanymy jáne adamdyq qasıetimen eldi, jerdi súıýdiń jarqyn úlgisin kórsetip ketti. Onyń avtorlyq jobalary – «Aıtýǵa ońaı» jáne «Qareket» baǵdarlamalarynyń aspaǵan asýy, ashpaǵan esigi, barmaǵan taqyryby, aıtylmaǵan sózi qalǵan joq. Jabyqqannyń janynan tabylǵan, jylaǵannyń kóz jasyn súrtken, jyǵylǵanǵa súıeý bolǵan osy jobalar áleýmettik tok-shoýdyń jańa formatyn jasap, ozyq úlgisine aınaldy. El ishinde «Aıtýǵa ońaı» atanyp ketken azamattyń eldiń esinde endigi qalǵan sózi «Qareket qylaıyq!» boldy. B.Quranbektiń qoıyn dápterinde qalǵan jazbalardyń birine kóz salsaq, onyń ómirlik prınsıpteri jaıly taǵy da oılanamyz: «Ar saqta! Namysty bol! Talaptan! Qareket qyl! Táýekel et! Ýádege berik bol! Márt bol! Aqylǵa sal! Qaıratty bol! Júregińdi jylyt! Bilimińdi kóbeıt! О́ner úıren! Salt-dástúrdi usta! Dástúrdi, mádenıetti ıger! Ata tarıhtan tálim men shabyt al! О́zińe, ózgelerge, aınalańa jaqsylyq jasa!».