Aty jaman indet, adamzatty alasapyran kúıge salǵan eki jyl ishinde qazaqqa qaltqysyz qyzmet qylǵan nebir tarlandardy aramyzdan alyp ketti. Sondaı iri azamattardyń qatarynda 25 jyldan astam ýaqyt boıy Qazaqstannyń túrli BAQ-tarynda eseli eńbek etken Mıhaıl Dorofeev boldy.
Qyryq toǵyz jyl ǵumyrynda qazaqstandyq belgili jýrnalıst, Informburo.kz saıty men 31 arnadaǵy «Informbıýro» baǵdarlamasynyń redaktory M.Dorofeev shynymen otandyq jýrnalıstıkanyń órkendep qanat jaıýyna orasan zor qyzmet etken tulǵa bolatyn.Eńbek jolyn Atyraý oblysynda bastaǵan, keıin respýblıkalyq KTK telearnasynda, «Ekspress K», «Gorod» jáne «Megapolıs» gazetterinde jumys istegen onyń mamandyǵyna adal kásibı jýrnalıst bolǵanyn Elbasy Nursultan Nazarbaevtyń Dorofeev dúnıeden ozǵanda onyń otbasyna joldaǵan jedelhatynan da ańǵarýǵa bolady. «Ol óz isiniń kásibı mamany edi, úlken jumys tájirıbesi boldy. Ol Qazaqstan Respýblıkasy Prezıdenti júldesiniń BAQ salasyndaǵy laýreaty, Jýrnalıstıka akademııasynyń akademıgi, Ulttyq senim keńesiniń múshesi boldy. Mıhaıl Dorofeev otandyq medıa salanyń damýyna zor septigin tıgizip, sapa men kásipqoılyqtyń jańa standarttaryn engizýge úles qosty», dedi Tuńǵysh Prezıdent.Aqparat jáne qoǵamdyq damý mınıstri Aıda Balaeva da jýrnalıst M.Dorofeev ómirden ozǵanda óziniń feısbýktegi paraqshasynda: «Mıhaıldi jeke tanıtyn edim, onyń ómirden ozýy – otandyq jýrnalıstıka úshin óte aýyr qaza. Onyń kóptegen dostary boldy, bári ony jaqsy kórdi jáne qurmettedi, kásibı jáne adamı qasıetterin qadirledi. Bárimiz ony saǵynatyn bolamyz», dep jazdy.Jaqsynyń aty ólmeıdi degenimizben, iri tulǵalardyń, kásibı mamandardyń orny árqashan oısyrap turady...