Almatyda astana kúnine oraı Bekzat Sattarhanov atyndaǵy «Boks álemi» sport kesheni ashyldy, dep habarlaıdy Egemen.kz.
Keshenniń ashylýyna aýdan ákimi Saıran Saıfedenov qatysty. Ol jas sportshylardy merekelerimen quttyqtap, olarǵa sáttilik pen úlken jeńister tiledi.
Keshen «Iýnost» kınoteatry ǵımaratynyń ornynda paıda boldy. Eki qabatty sport kesheniniń boks zaly - 200 sharshy metr. Sonymen qatar, bı jáne gımnastıka zaldary bar.
«Osy ǵımaratty bizge bergeni úshin Áýezov aýdanynyń ákimdigine rahmet. Ol 15 jyl bos turdy. Biz jóndeý jumystaryn júrgizdik. Barlyǵy 33 mln teńge ınvestısııa salyndy. Bul áleýmettik joba. Kelýshilerdiń arasynda qazirdiń ózinde qalalyq jáne respýblıkalyq chempıonattardyń jeńimpazdary bar. Kópbalaly jáne turmysy tómen otbasylardyń balalaryna úlken jeńildikter bolady», dedi sport kesheniniń dırektory Baǵdat Syrlybaev.
Sport kesheni barlyq qajetti quraldarmen jabdyqtalǵan. Boks zalynda bir ýaqytta 30 adam jattyǵa alady. Munda jańadan bastaýshylar da, kásipqoı boksshylar da kele alady. Bolashaqta zalda úlken jarystar ótedi.
Bul jobanyń maqsaty - sportpen shuǵyldanýǵa jáne dene shynyqtyrýǵa qolaıly jaǵdaılar jasaý, turǵyndar arasynda salaýatty jáne belsendi ómir saltyn nasıhattaý, adam ómiriniń sapasyn jaqsartý.