Sarapshylar bolsa teńgeniń endigi taǵdyry ne bolady degen máselege alańdaı bastady. Valıýta baǵamynyń erkin aınalymǵa jiberilgenine birneshe jyl boldy. Biraq Ulttyq bank anda-sanda bolsa da ıntervensııa jasap teńgeni «qutqaryp» qalyp júr. Bul joly da tól teńgemiz Ulttyq banktiń kómegin qajetsinip otyrǵany belgili bolyp qaldy. Ulttyq banktiń monetarlyq operasııalar departamentiniń dırektory Nurjan Tursynhanov mereke kúnderi syrtqy naryqtardaǵy ahýal qalaı damydy jáne demalys kúnderinen keıin teńgeniń dınamıkasyna qandaı faktorlar áser ettkenin aıtty, dep jazady Egemen.kz.
Bas bank ókiliniń aıtýynsha, uzaq demalys kúnderinen keıin teńgeniń álsireýine sheteldegi oqıǵalar, atap aıtqanda, munaı óndirýshi elder ókilderiniń munaı óndirý deńgeıi týraly kelissózderi áser etti.
Aq úıdiń baspasóz hatshysy Djen Psakı 6 shildedegi brıfıng barysynda AQSh bıligi joǵary deńgeıdegi basshylyqty ustap otyrǵanyn málimdedi. Saýd Arabııasy men BAÁ ókilderimen konsýltasııalar, OPEK músheleri jáne onyń seriktesteri qol jetimdi baǵamen senimdi energııamen qamtamasyz ete alady degen úmit bar. Osy habarlamanyń nátıjesinde munaı baǵasy barreline 77,8 dollardan 74,13 dollarǵa deıin quldyrap, kúndizgi 5 paıyzdyq quldyraýdy kórsetti.
«Investorlardyń dúnıejúzilik táýekeldik deńgeıiniń tómendep ketýi teńgege qysymdy kúsheıtip otyr. Atap aıtqanda, Kovıd-19 delta shtamynyń taralýy týraly alańdaýshylyq kúsheıip, keıbir elder karantındik sharalardy qaıtadan kúsheıtýge májbúr. Bizdiń negizgi saýda seriktesterimizdiń valıýtasy - Reseı rýbli osy aptanyń basynan beri 1,6% álsiredi. Munaıdyń qubylmaly baǵalary, jańa shtamdardyń taralýy jáne Kovıd-19 pandemııasy valıýtalarǵa, sonyń ishinde teńgege qysym jasaýdy jalǵastyrýda. Ulttyq bank syrtqy naryqtardaǵy ahýaldy baqylaýdy jalǵastyrýda, turaqsyzdanǵan jáne alyp-satarlyq aýytqýlar bolǵan jaǵdaıda, valıýtalyq ıntervensııalar júrgizý quqyǵyn ózine qaldyrady», dedi Nurjan Tursynhanov.