Numbeo portaly densaýlyq saqtaý salasynyń sapasy boıynsha álem elderiniń reıtıngin jarııalady, dep habarlaıdy Egemen.kz.
2021 jyldyń birinshi jartyjyldyǵy boıynsha qurylǵan reıtıngte Qazaqstan 95 eldiń ishinde 58-shi orynǵa ıe boldy. Kósh basynda Taıvan, Ońtústik Koreıa jáne Fransııa tur.
Reıtıngte eldiń ındeksi 59,62 boldy. Ol 100-ge neǵurlym jaqyn bolsa, eldegi densaýlyq saqtaý júıesi soǵurlym jaqsy dep sanalady. Indeksti esepteý kezinde densaýlyq saqtaý mamandarynyń, dárigerlerdiń biliktiligi, jabdyqtar sapasy, qyzmet baǵasy jáne t.b nazarǵa alynady.
TMD elderiniń ishinde Reseı, Ýkraına, Belarýssııa, Ázirbaıjan kórsetkishteri Qazaqstanǵa qaraǵanda nashar. Sońǵy qatarda Venesýela tur.
Ranking.kz jazýynsha, 2021 jyldyń birinshi toqsanynda elimizdiń densaýlyq saqtaý salasynda 546,4 mlrd teńgege qyzmet kórsetilgen. Bul 2020 jyldyń sáıkes kezeńimen salystyrǵanda 47,2% kóp.
Aımaqtyq kontekstte qyzmetterdiń eń úlken kólemi Almatyǵa tıesili (93,8 mlrd teńge), bul ótken jylmen salystyrǵanda 46% kóp. Jetekshi úsh aımaqqa Nur-Sultan qalasy (71,1 mlrd teńge) jáne Almaty oblysy (45,1 mlrd teńge) kirdi.
Bıyl bıýdjet esebinen 429,8 mlrd teńgege medısınalyq qyzmet kórsetilgen. Bul ótken jylmen salystyrǵanda 46,7% artyq. Halyq esebinen kórsetiletin qyzmetter kólemi 31,5%-ǵa, ıaǵnı 65,9 mlrd teńgege deıin ósti. Kásiporyndar esebinen kórsetilgen qyzmet quny - 81,5%-ǵa artyp, 50,7 mlrd teńgeni qurady.
Qyzmet túrleri boıynsha 285,3 mlrd teńge - stasıonarlyq qyzmetterge, 113,9 mlrd teńge - jalpy dárigerlik praktıka salasyndaǵy qyzmetterge, 34,7 mlrd teńge - arnaıy medısınalyq praktıka salasyndaǵy qyzmetterge, 15,4 mlrd teńge stomatologııa salasyna jumsalǵan.