Qurlyqtyq hokkeı lıgasynda (QHL) óner kórsetip júrgen Nur-Sultannyń «Barys» klýby 2021-2022 jyldardaǵy maýsymǵa qamdana bastady, dep jazady Egemen.kz.
Kúni keshe «Barystyń» bas bapkeri Iýrıı Mıhaılıstiń óz ornynda qalǵany jaıynda resmı aqparat tarady. Qaraǵandynyń týmasy 2020 jyldyń jazynda elordalyq klýbtyń tizginin ustaǵany málim. Aıtýly mamannyń jetekshiligimen «Barys» KHL-dyń pleı-off dodasyna shyǵyp, Gagarın kýbogy úshin talasý múmkindigine ıe boldy.
Sonymen qosa Mıhaılıs Qazaqstannyń ulttyq quramasyna da jetekishik etti. Bıyl Latvııada uıymdastyrylǵan álem chempıonatynda jerlesterimiz jeti oıynnyń tórteýin óz paıdasyna sheship, óz tobynda besinshi orynǵa taban tiredi. Bul jarys barysynda bizdiń jigitter Latvııa, Fınlıandııa, Germanııa jáne Italııa qurmalaryn utty. Sóıtip, Qazaqstannyń hokkeıshileri álem chempıonatynyń qorytyndysy boıynsha óz tarıhynda tuńǵysh ret úzdik ondyqtyń qataryna qosyldy.
«Barys» hokkeı klýby men Iýrıı Mıhaılıs arasyndaǵy kelsimshart 2022 jyldyń 30 sáýirine deıin jasaldy. Sondaı-aq bapkerler shtabynda da ózgeris joq. Aleksandr Ahsıger, Andreı Shaıanov, Maksım Semıonov jáne Aleksandr Shımın bas bapkerdiń kómekshileri bolyp bekitildi.