QR Ekologııa, geologııa jáne tabıǵı resýrstar mınıstri Maǵzum Myrzaǵalıev qazaqstandyq fermerler sýmen qalaı qamtamasyz etiletinin aıtty, dep habarlaıdy Egemen.kz.
«Fermerlerdi sýmen qamtamasyz etý maqsatynda biz kelesi jumystardyń júrgizilýin josparladyq. Birinshiden, kórshi eldermen qarym-qatynas ornatý. Syrdarııa ózeni boıynsha biz Qyrǵyz elimen qosymsha sý aǵyzý týraly kelisimge keldik. Vegetasııa shyńynda Toqtoǵul sý qoımasynan qosymsha 330 mıllıon tekshe metr sý qory bolady. Dál osyndaı sý kólemin О́zbekstan aýmaǵy arqyly ótkizý týraly da ýaǵdalastyqqa qol jetkizdik. Tájik jáne ózbek taraptarymen birlesip, bıyl 16 maýsymda «Bahrı Tochık» sý qoımasynyń jumys rejımin kelisý boıynsha maýsym-tamyz kezeńine arnalǵan jumys keńesiniń hattamasyna qol qoıyldy», dedi Maǵzum Myrzaǵalıev.
Mınıstrdiń aıtýynsha, búginde kollektorlyq-drenajdyq sýlardy qaıta paıdalaný tájirıbesi qolǵa alyndy. Soǵan baılanysty arnalardy mehanıkalyq tazartý jumystary júrgizilip, egindi sýarýdyń kestesi ázirlendi.
«Jaıyq ózeni boıynsha osy jyldyń maýsym aıynda Orynbor qalasynda Sý sharýashylyǵy uıymdarynyń kezdesýi ótti. Onda Jaıyq ózeni basseınindegi sý sharýashylyǵy jaǵdaıy talqylandy. Kezdesý qorytyndysy boıynsha aldaǵy jaz-kúz mezgiline arnalǵan Irıklın sý qoımasynyń jumys rejımi bekitildi. Odan bólek, bıyl aqpan-naýryz aılarynda biz aýyl sharýashylyǵy mınıstrligimen óńirlerge baryp jınalystar ótkizdik. Qalyptasyp otyrǵan sý sharýashylyǵy jaǵdaıyn talqylap, sýdy kóp qajet etetin daqyldardyń egistigin azaıtýdy usyndyq», dedi mınıstr.