QR Mádenıet jáne sport mınıstri Aqtoty Raıymqulova Dımash, Imanbek syndy qazaq artısteriniń shetelde tez tanymal bolýynyń qupııasyn aıtty, dep jazady Egemen.kz.
«Reseıde qazaqtardyń fenomeni týraly kóp aıtylady. Bizdiń bir kezdesýimizde de osy týraly sóz boldy. Shamasy, mýzyka men poezııaǵa degen erekshe qatynas - genetıkalyq kodymyzda bar nárse. Bizdiń jerimizde dúnıege kelgenderdiń bárinde aqyndyq qabilet bar ekenine tolyq senimdimin», dedi Aqtoty Raıymqulova.
Mınıstr 1925 jyly Parıjde ótken Dúnıejúzilik kórmede Arqa ániniń áıgili dástúrin kórermen nazaryna usynǵan Ámire Qashaýbaevty eske túsirdi.
«Qazir álem jahandyq sıpatqa ıe boldy. Barlyq kedergi joıyldy. Al Qazaqstan álemdik mádenı kommýnıkasııaǵa kóbirek aralasa bastady. Búginde bizdi barlyq kontınette tyńdaıdy. Qazaq artısteriniń jetistik qupııasy mádenı ortanyń, qol jetimdi mýzykalyq bilimniń, tabıǵı talanttyń jáne árıne, eńbekqorlyqtyń erekshe úılesiminde dep oılaımyn. Mysaly, Imanbek, Dımash nemese bizdiń basqa da óner maıtalmandary týraly kim ne aıtsa da, olardyń jetistigi, eń aldymen, kóp saǵattyq jalyndy jumystyń nátıjesi.
Syrttan qaraǵanda, olardyń jetistigi sáttilik sııaqty kórinýi múmkin. Mysaly Jah Khalib konservatorııada oqydy. Meniń shákirtim. Ol kezde men «Art-menedjment» kafedrasynyń meńgerýshisi jáne prorektor boldym. Ol stýdııada kóp jumys istedi. Túnde jumys isteıtindikten, sabaqqa kózi qyzaryp keletin. О́te daryndy jigit. Iаǵnı, bári aıaq astynan kele salǵan joq», dedi mınıstr.