Májilis tóraǵasy Erlan Qoshanov Eýrazııa ekonomıkalyq forýmyna qatysý úshin Astanaǵa kelgen Kýbanyń Vıse-Prezıdenti Salvador Valdes Mesamen kezdesti. Taraptar parlamentaralyq baılanysty nyǵaıtý, sondaı-aq áleýmettik-ekonomıkalyq jáne mádenı-gýmanıtarlyq salalardaǵy ekijaqty qatynastardy tereńdetý máselelerin talqylady, dep habarlaıdy Egemen.kz
Mártebeli meımandy qarsy alǵan Májilis spıkeri Eýrazııa ekonomıkalyq odaǵynyń is-sharalaryna belsene qatysqany úshin Kýba Vıse-Prezıdentine alǵysyn bildirdi. Erlan Qoshanov Qazaqstan men Kýbanyń dıplomatııalyq qarym-qatynasyna bıyl 34 jyl tolatynyn atap ótti. Kýba – elimizde óz elshiligin ashqan jáne dıplomatııalyq ókildigin Astanaǵa kóshirgen alǵashqy memlekettiń biri.
Biz eki el arasyndaǵy ózara senimge negizdelgen qarym-qatynas pen qoldaýdy joǵary baǵalaımyz. Memleketterimizdiń basshylary túrli alańdarda birneshe ret kezdesti. Bizdiń Prezıdentimiz 1995 jyly Qazaqstannyń Syrtqy ister mınıstri retinde Gavanaǵa barǵanynyń úlken sımvoldyq máni bar. Al 2021 jyly Memleket basshysy retinde Kýbada Qazaqstan Elshiligin ashý týraly Jarlyqqa qol qoıdy. Búginde prezıdentter Qasym-Jomart Toqaev pen Mıgel Dıas-Kanel senimdi dıalogty jalǵastyrýda, dedi Erlan Qoshanov.
Májilis tóraǵasynyń aıtýynsha, ekijaqty baılanysty nyǵaıtýda parlamentaralyq yntymaqtastyqty damytýdyń mańyzy zor. Bul rette Qazaqstan-Kýba depýtattyq dostyq toptary qurylyp, zań shyǵarý salasynda tájirıbe almasýdy keńeıtýdiń, sondaı-aq parlamentaralyq uıymdar aıasynda yqpaldastyqty kúsheıtýdiń jospary naqtylanǵan. Kezdesýde Májilis spıkeri Kýbanyń Ulttyq halyq bıligi Assambleıasynyń tóraǵasyn Qazaqstanǵa resmı saparmen kelýge shaqyrdy.
Memleket basshysy Kýba Respýblıkasynyń Vıse-prezıdenti Salvador Valdes Mesamen kezdesti
Erlan Qoshanov Kýba tarapyna elimizde júrgizilip jatqan saıası ózgerister týraly málimet berdi. Referendýmda jańa Halyq Konstıtýsııasynyń qabyldanýyna erekshe nazar aýdaryldy. Azamattardyń jańa suranystaryn eskere otyryp, Ádiletti jáne Progressıvti Qazaqstan qurýǵa baǵdarlanǵan Ata zań «Kúshti Prezıdent – Yqpaldy Parlament – Esep beretin Úkimet» formýlasy boıynsha bıliktiń barlyq tarmaǵyn qaıta jańǵyrtady. Sonymen qatar konstıtýsııalyq reforma bir palataly Parlamentke – Quryltaıǵa kóshýdi, sondaı-aq Vıse-Prezıdent pen Qazaqstan Halyq Keńesi ınstıtýttaryn qurýdy bekitti.
О́z kezeginde Salvador Valdes Mesa qonaqjaılyq tanytqany úshin Májilis tóraǵasyna alǵys bildirdi. Kýba Vıse-Prezıdenti Eýrazııa ekonomıkalyq forýmy joǵary deńgeıde uıymdastyrylǵanyn jáne keń aýqymdy ózekti máselelerdi talqylaýǵa múmkindik bergen atap ótti. Ol sondaı-aq búginde Qazaqstannyń damý qarqyny joǵary, zamanaýı ári serpindi ilgerilep kele jatqan memleket retinde óz ornyn senimdi túrde nyǵaıtyp otyrǵanyn aıtty. Kýba Vıse-Prezıdentiniń pikirinshe, eki el arasynda seriktestikti odan ári keńeıtýdiń áleýeti zor.
Kezdesý barysynda taraptar saýda, ınvestısııa, bilim berý, týrızm jáne sport salalaryndaǵy yntymaqtastyq jaıyn talqylady. Eki el halyqtarynyń múddesi úshin sharttyq-quqyqtyq bazany dáıekti túrde keńeıtý qajettigine erekshe nazar aýdaryldy.