Qasym-Jomart Toqaev Eýrazııalyq ekonomıkalyq odaqqa múshe elderdegi óndiris oshaqtary men agroónerkásip keshenin sıfrlyq transformasııalaýdyń mańyzyna nazar aýdardy, dep jazady Egemen.kz.
Prezıdenttiń paıymynsha, ekonomıkany sıfrlandyrý – tehnologııalyq trend qana emes, básekege qabiletti bolýdyń basty kepili.
«Qazaqstan bul synaqqa aýqymdy Sıfrlyq transformasııa tujyrymdasyn qabyldaý arqyly júıeli árekettermen jaýap bermek. О́nerkásip sektory men taý-ken jáne metallýrgııa keshenindegi robottandyrý, «bulttyq» sheshimder, iri kásiporyndardyń «sıfrlyq telnusqasy» ónimdilikti ulǵaıtyp, shyǵyndy azaıtady. Aýyl sharýashylyǵyn avtomattandyrý mol ónim jınaýǵa, sý únemdeýge, qorshaǵan ortaǵa zııandy azaıtýǵa septigin tıgizedi. Mal sharýashylyǵyna qaǵaz júzindegi qujat aınalymynan bas tartyp, eseptiń dáldigin arttyratyn birqatar sıfrlyq júıe engizildi. Elimizdiń túkpir-túkpirinde 650-den astam «aqyldy» fermalar jumys istep tur. Onda sıyr saýý, bordaqylaý jáne mıkroklımatty qadaǵalaý úrdisteri avtomattandyrylǵan júıelermen jabdyqtalǵan. Egin jáne tuqym sharýashylyǵynda ónimdi «egis dalasynan tutynýshy dastarqanyna deıin» jetkizý tizbegin qadaǵalaıtyn júıe engizilip jatyr. Tyńǵylyqty josparlaý men sıfrlyq boljaý múmkindikterin paıdalaný nátıjesinde Qazaqstanda ekinshi jyl qatarynan egin bitik shyǵyp, 27 mıllıon tonna kóleminde astyq jınaldy. Bul – rekordtyq kórsetkish. Aýyl sharýashylyǵy jerlerin jappaı sıfrlandyrý jumysy júrgizilýde. Agrodrondar, jerseriktik navıgasııalar men meteostansııa málimetteri keńinen qoldanyla bastady. Jer telimin paıdalanýǵa berý úderisi elektrondy formatqa kóshirildi. Dıhandar men sharýalardy memleket tarapynan qoldaý tetikteri tolyqtaı elektrondyq formatqa aýysty. Bul jemqorlyq táýekelderin azaıtady», dedi Qasym-Jomart Toqaev. Aıta keteıik, Memleket basshysy Joǵary Eýrazııalyq ekonomıkalyq keńestiń keńeıtilgen quramdaǵy kezekti otyrysynda ıntegrasııalyq qurylymdy odan ári qarqyndy damytýdy kózdeıtin birqatar strategııalyq basymdyqty atady.