Astanada Prezıdent Qasym-Jomart Toqaevtyń tóraǵalyǵymen Joǵary Eýrazııalyq ekonomıkalyq keńestiń keńeıtilgen quramdaǵy kezekti otyrysy ótti. Joǵary keńestiń tóraǵasy retinde Qazaqstan Prezıdenti ıntegrasııalyq qurylymdy odan ári qarqyndy damytýdy kózdeıtin birqatar strategııalyq basymdyqty atady, dep habarlaıdy Egemen.kz.
Sonymen qatar Memleket basshysy elimizdiń usynystaryna qoldaý kórsetkeni úshin áriptesterine alǵys aıtty.
«Jasandy ıntellektini jaýapkershilikpen damytý jónindegi birlesken málimdemeni qabyldaý maqsatymyzdyń ortaq ekenin kórsetken mańyzdy sheshim boldy. Osy saladaǵy belsendi yqpaldastyqqa úmit artamyn. Kúsh-jigerimizdi kelesi basym baǵyttarǵa jumyldyrýdyń máni zor dep sanaımyn. Birinshi. Eýrazııalyq ıntegrasııanyń sıfrlyq negizin nyǵaıtý. Sıfrlandyrý men jasandy ıntellekt arqyly jańa tehnologııalyq júıe qalyptastyrý kezinde derekterdi jedel óńdeý, avtomattandyrý jáne ınnovasııany jappaı engizý tabystyń negizgi faktoryna aınala bastady. Sarapshylardyń paıymyna súıensek, álemde jasandy ıntellekt tehnologııalaryna quıǵan qarjy kólemi 1 trıllıon dollarlyq mejeden asty. Aldaǵy onjyldyqta onyń jahandyq ekonomıkadaǵy jıyntyq úlesi birneshe ese kóbeıip, 7 trıllıon dollarǵa jetýi múmkin. Ozyq tehnologııalar eýrazııalyq ıntegrasııanyń qýatty katalızatoryna aınalýy kerek. Bul qazirdiń ózinde júzege asa bastady. EAEO keńistiginde osy baǵyttaǵy jumys dáıekti túrde jalǵasyp keledi dep nyq senimmen aıtýǵa bolady. Transformasııa óndiris jáne logıstıkadan bastap, aýyl sharýashylyǵy men memlekettik basqarýǵa deıingi barlyq salany qamtıdy», dedi Qasym-Jomart Toqaev.
Memleket basshysynyń aıtýynsha, Qazaqstan jasandy ıntellektini engizý boıynsha birqatar júıeli sharany qolǵa aldy.
«Astana Hub bazasynda qarqyndy ilgerilep kele jatqan ári tolyqqandy startap-ekojúıe qalyptasýda. Elimizde 100-den astam jańa joǵary tehnologııalyq kompanııa jedel damyp keledi. Qazaqstan tehnologııany netto-eksporttaýshy mártebesin resmı túrde dáleldedi. IT qyzmetter eksportynyń kólemi 1 mıllıard dollardan asty. Bizdiń bastapqy jetistikterimiz halyqaralyq deńgeıde moıyndaldy. EGDI (E-Government Development Index) jahandyq reıtıngine sáıkes, Qazaqstan 24-oryn alady. Al onlaın qyzmetterdiń sapasy boıynsha álemdegi úzdik ondyqqa kiredi. Endigi mindet – osy tabysty tájirıbeni keńinen taratý. Astanada Halyqaralyq Alem.ai jasandy ıntellekt ortalyǵy iske qosyldy. Bul talantty baǵdarlama ázirleýshiler shoǵyrlanǵan ortalyq qana emes, jasandy ıntellekt negizindegi qoldanbaly sheshimderdi oılap tabatyn ári engizetin aımaqtaǵy basty alań sanalady. EAEO-ǵa múshe memleketterdiń sıfrlandyrý salasyndaǵy jetistikterin, memlekettik basqarýdaǵy platformalyq sheshimderi men zamanaýı tásilderdi engizý úlgilerin muqııat zerdeleımiz ári joǵary baǵalaımyz. Odaqqa múshe elderdiń árqaısysy sıfrlyq transformasııanyń jekelegen baǵyttarynda aıtarlyqtaı tájirıbe jınady. Ulttyq quziretterdi damytýmen qatar birlesken tehnologııalyq bastamalardy qalyptastyrýǵa belsendi túrde atsalysqan jón. Úzdik tájirıbeler men tıimdi sheshimderdi bólisýimiz kerek. Bul EAEO aıasyndaǵy sıfrlyq damýdy jedeldetip, ekonomıkalarymyzdyń básekege qabiletin arttyrýǵa múmkindik beredi», dedi Prezıdent.
Eske sala keteıik, keshe Astanada V Eýrazııa ekonomıkalyq forým ótti. Forýmnyń plenarlyq otyrysynda Prezıdent Qasym-Jomart Toqaev sóz sóıledi.