Búgin Qazaqstan Respýblıkasynyń Mádenıet jáne sport mınıstri Aqtoty Raıymqulova Belarýs Respýblıkasynyń Mádenıet mınıstri Anatolıı Markevıchpen kezdesti, dep habarlaıdy Egemen.kz mınıstrliktiń baspasóz qyzmetine silteme jasap.
Sonymen qatar eki eldiń mádenıet salasyna jaýapty mınıstrdiń júzdesýine Qazaqstannyń Belarýs Respýblıkasyndaǵy Tótenshe jáne О́kiletti Elshisi, TMD Jarǵylyq organdary janyndaǵy Turaqty О́kil qyzmetin qosa atqarýshy Asqar Beısenbaev pen «Qazaqkonsert» memlekettik konsert uıymynyń dırektory Jeńis Seıdýllauly qatysty. Aqtoty Raıymqulova búginde eki el arasyndaǵy tatý kórshilik qarym-qatynas turaqty damyp, mádenı-gýmanıtarlyq baılanys eki halyq arasyn baılanystyrýshy kópirge aınalyp kele jatqanyn atap ótti.
«Yntymaqtastyq aıasynda birqatar aýqymdy mádenı joba júzege asyp jatyr. Máselen, elimizdiń ókilderi «Belarýs kitaptary» halyqaralyq jármeńkesine, «Vıtebskidegi Slavıan bazary» halyqaralyq óner festıvaline, «Listapad» halyqaralyq kınofestıvali syndy mamandandyrylǵan mádenı is-sharalarǵa turaqty túrde qatysady. Belarýs halqynyń mádenı murasyn elimizde tanytý sheńberinde Belarýs pen Qazaqstannyń memlekettik muraǵattary men murajaılary arasynda áriptestik ornatyldy. Sonymen qatar ádebıet pen óner, kınematografııa qaıratkerleri arasynda seriktestik jandanyp keledi.
Osy oraıda bıyl 17 mamyr men 24 maýsym aralyǵynda Belarýs Respýblıkasynda rejısser Bekbolat Shekerovtyń «1941 jyldyń jazy» atty kórkem fılmniń túsirilimi ótkenin atap ótkim keledi. Bul Uly Jeńistiń 75 jyldyǵyna jáne ekinshi dúnıejúzilik soǵysqa qatysýshy, ǵalym, jazýshy jáne qoǵam qaıratkeri Ádı Sháripovtyń jaýyngerlik joly jaıly tarıhı týyndy.
Jyl saıyn Vıtebskide ótetin «Slavıan bazary» halyqaralyq óner festıvali TMD kóleminde ǵana emes, qurlyq aralyq deńgeıde tanylǵan jobaǵa aınalyp úlgerdi. Bizdiń ónerpazdar uzaq jyldan beri «Slavıan bazaryna» turaqty qatysyp, júldegerler qatarynan kórinip júr. Osy rette tanymal ánshi Dımash Qudaıbergen óner jolynda osy festıvalge qatysyp, óner kórsetkenin aıta alamyz. Al bıyl Qazaqstan atynan estrada oryndaýshylary baıqaýynda Qazaq ulttyq óner ýnıversıtetiniń 3-kýrs stýdenti Rýhııa Baıdúkenova baq synaıdy. Al HIH halyqaralyq balalar mýzykalyq baıqaýyna «Boztorǵaı-2019» halyqaralyq balalar shyǵarmashylyǵy baıqaýynyń jeńimpazy 10 jastaǵy Amına Asgatova qatysady. Sóz arasynda aıtqan Dımash Qudaıbergen bıyl halyqaralyq baıqaýdyń qazylar alqasynyń múshesi», dedi mınıstr.
Osydan keıin Qazaqstan Respýblıkasynyń Mádenıet jáne sport mınıstri eki memlekettiń mádenıet kúnderin ótkizý mádenı-gýmanıtarlyq saladaǵy yntymaqtastyqty nyǵaıtýda mańyzdy qadam ekenin jetkizdi.
«2018 jyly Belarýs Respýblıkasynda Qazaqstannyń Mádenıet kúnderi uıymdastyryldy. Bıyl 30 qyrkúıekten bastap 3 qazanǵa deıin elimizde Belarýs Respýblıkasynyń Mádenıet kúnderin ótkizýdi josparlap otyrmyz. Mádenıet kúnderi aıasynda Belarýs Respýblıkasynyń úzdik shyǵarmashylyq ujymdary óner kórsetedi. Osy mádenıet kúnderi aıasynda Belarýs kınosynyń kúnderin ótkizý josparda bar», dedi.
Sondaı-aq Aqtoty Raıymqulova Qazaqstan men Belarýs memleketiniń shyǵarmashylyq uıymdary arasynda turaqty túrde tájirıbe almasý júzege asyp jatqany qýantatynyn aıtty.
«Bizdiń «Qazaqkonsert» memlekettik konsert uıymy Belarýs memlekettik fılarmonııasymen Memorandýmǵa qol qoıý máselesin talqylaýǵa daıyn. О́z kezeginde Belarýs Respýblıkasynyń jeke oryndaýshylary men shyǵarmashylyq ujymdaryn 2022 jyly ótetin «Operalııa» halyqaralyq festıvali, Bıbigúl Tólegenovanyń Halyqaralyq vokalıster baıqaýy (2023 jyly), mýzyka aspaptarynda oryndaýshylardyń halyqaralyq televızııalyq balalar baıqaýy (bıyl qazan aıynyń sońy – qarasha aıynyń basy) syndy is-sharalarǵa qatysýǵa shaqyramyz. Sonymen qatar ekijaqty qarym-qatynasty odan ári damytý maqsatynda óner ujymdarynyń gastrolin ótkizýdi usynamyz», deı kele, eki taraptyń osy is-sharalarǵa qatysýy ózara is-qımylǵa jańa serpin beretinine, mádenıet pen óner salasynda baılanys ornatýǵa jáne tájirıbe almasýǵa yqpal etetinine senimdi ekenin aıtty.
О́z kezeginde Anatolıı Markevıch eki memleket arasyndaǵy mádenı-gýmanıtarlyq baılanysty Belarýs taraby jandandyrýǵa nıetti ekenin aıtty.
«Eki eldiń óner, ádebıet, sport jáne ózge saladaǵy qaıratkerleriniń baılanysy uzaq jyldan beri jalǵasyp keledi. Sizderdiń osy kezdesý barysynda aıtqan usynystaryńyzdy qarastyryp, pandemııaǵa qaramastan áriptestiktiń órisin keńeıtýge daıyn ekenimizdi jetkizemin», dep aıtty Belarýs Respýblıkasynyń Mádenıet mınıstri.