Qaraǵandy oblysynyń ákimi Jeńis Qasymbek onlaın rejıminde aýyl ákimderiniń alǵashqy tikeleı saılaýyn ótkizýge daıyndyq týraly keńes ótkizdi, dep habarlaıdy Egemen.kz.
Oblystyq saılaý komıssııasynyń tóraǵasy Erqara Aımaǵambetovtyń barlyq uıymdastyrý máseleleri jergilikti ákimdiktermen birlesip sheshilgenin aıtty.
Saılaýshylar tizimin naqtylaý jalǵasýda. 22 shildeden bastap bıýlletenderdi daýys berý oryndaryna jetkizý bastalady.Saılaý sanıtarlyq-epıdemıologııalyq talaptardy saqtaı otyryp ótedi.
«Basty sharttardyń biri – saılaý komıssııalarynyń múshelerin KVI-ge qarsy vaksınasııalaý. Búgingi kúni vaksınasııalaýǵa jatatyndardyń 72%-y tolyq egildi. Qalǵandary vaksınanyń birinshi komponentin aldy. Saılaý ýchaskelerinde bolatyn baqylaýshylar men senim bildirýshiler úsh kúnnen keshiktirmeı alynǵan PTR testiniń teris nátıjesin usynýy kerek», dedi oblystyń bas sanıtarlyq dárigeri Iýrıı Zalygın.
Saılaý ýchaskelerinde Ashyq júıesin paıdalaný múmkindigi qarastyrylýda. Sonymen qatar, barlyq saılaý ýchaskeleri antıseptıkter, bir ret qoldanylatyn maskalar men qolǵaptar sııaqty jeke qorǵanys quraldarymen qamtamasyz etiledi. Ýchaske kireberisinde dene qyzýyn ólshep, áleýmettik qashyqtyqty saqtaý mindetti. Táýekeldi azaıtý úshin daýys berý stendteri aldyńǵy perdelersiz bolady.
Qaraǵandy oblysynyń ákimi sanıtarlyq-epıdemıologııalyq talaptardy tolyq qamtamasyz etýdi, ýchaskelerdiń materıaldyq-tehnıkalyq jabdyqtalýyn jáne múmkindigi shekteýli adamdarǵa jaǵdaı jasaýdy qaıta tekserýdi tapsyrdy.
«Aýyl ákimderiniń alǵashqy tikeleı saılaýyna birneshe kún qaldy. Bizdiń ortaq jumysymyz – olardyń ashyqtyǵyn, aıqyndyǵy men zańdylyǵyn qamtamasyz etý. Ár daýys mańyzdy. Aýyl turǵyndary kelip, óz tańdaýyn jasap, ózderiniń konstıtýsııalyq saılaý quqyǵyn iske asyra alýy qajet», dep atap ótti oblys ákimi.