Memleket basshysy Qasym-Jomart Toqaevtyń byltyrǵy «Jańa jaǵdaıdaǵy Qazaqstan: is-qımyl kezeńi» Joldaýynda bergen tapsyrmasyna sáıkes keshe táýelsiz Qazaqstan tarıhynda tuńǵysh ret elimizdiń 14 óńiriniń barlyǵynda aýyl ákimderin halyqtyń tikeleı saılaýy ótti.
El Prezıdenti «Táýelsizdik bárinen qymbat» baǵdarlamalyq maqalasynda: «Saıası reforma bir kúnniń nemese bir jyldyń sharýasy emes. Muny el irgesin shaıqaltpaı, bereke-birligin buzbaı, baıyppen jáne birtindep iske asyrýymyz kerek», dep qadaı aıtqanyndaı, alǵashqy bolyp óńirlerdegi 730 aýdandyq mańyzy bar qala, aýyl, kent jáne aýyldyq okrýg turǵyndary jergilikti saılaý ýchaskelerine uıymshyldyqpen kelip, ózderiniń konstıtýsııalyq quqyǵyn iske asyrdy. Olardyń eldi meken basshysyn tikeleı saılap qana qoımaı, ony balamaly negizde tańdaýyna múmkindik berildi. Munyń ózi óńirlerdegi saıası belsendilikti eleýli túrde arttyryp, halyqtyń Memleket basshysynyń saıası reformalarynyń biri hám biregeıi bolyp sanalatyn demokratııalyq damý jolyndaǵy mańyzy zor qadamdy jan-jaqty qoldap otyrǵandyǵyn kórsetti. Ákimdikke kandıdat bolyp tirkelgen 2297 úmitkerdiń 1419-y nemese 61,8 paıyzy ózin ózi usynǵan, al 878-i (38,2 paıyz) elimizdegi barlyq 6 saıası partııa usynǵan azamattar ekendigi – sonyń aıǵaǵy.
Aýyl ákimderi saılaýynyń ádil ótýine múddeli azamattar, qoǵamdyq birlestikter men saıası partııalardyń ókilderi daýys berý úderisine baıqaýshylar retinde qatysyp, saılaý zańnamasy talaptarynyń buljytpaı saqtalýyn qadaǵalady.
Bul elimizdiń qoǵamdyq-saıası ómirindegi betburysty beles ekendigi sózsiz.