Bizdiń oblysta 44 aýyldyq deńgeıdegi ákimniń tikeleı saılaýy 130 eldi mekende ótti. Úmitker bolyp 168 adam usynyldy. Olardyń 59-yn saıası partııalar usynsa, 109-y – ózin ózi usynǵandar
– Aýyl ákimderin saılaý kúni 140 saılaý komıssııasy jumys júrgizdi. Onyń 14-i – aýmaqtyq, 126-sy – ýchaskelik. Saılaýshylardyń daýys berýge kelýi týraly aqparat saǵat 10.00-nan keshki 20.00-deıin aýmaqtyq saılaý komıssııasynyń ınternet paraqshalarynda ornalastyrylady, – dedi brıfıngte oblystyq aýmaqtyq saılaý komıssııasynyń tóraıymy Gúlnár Amanjolova.
Onyń aıtýynsha, saılaý aldyndaǵy úgit kezeńinde oblystyq, aýmaqtyq komıssııalarǵa, sottarǵa kandıdattarynyń quqyqtaryna qysym jasaý jóninde eshqandaı shaǵym túspegen.
Indettiń taralýynyń aldyn alý úshin daýys berýge kelgen turǵyndar arasynda áleýmettik qashyqtyqty saqtaý qadaǵalandy.
Baıqaýshylar respýblıkalyq «Partııalyq emes baqylaý» qoǵamdyq uıymynyń fılıalynda daıyndyqtan ótken.
Saǵat 12-degi jaǵdaı boıynsha óz daýystaryn bergen saılaýshylar sany 50 paıyzǵa jýyqtaǵan. Sonyń ishinde Ekibastuz, Aqsý qalalarynyń aýyldyq aýmaqtarynda saılaýshylardyń 50 paıyzǵa jýyǵy, al Ertis aýdanynda turǵyndardyń 65 paıyzy daýys berip úlgergen.
Kenjekól aýylyndaǵy №50 saılaý ýchaskesinde aýyl ákimdiginen úmitker 5 adam tirkelgen eken. Onyń úsheýi – saıası partııalardyń atynan, ekeýi – ózin ózi usynǵandar.
– Qandaı ákim kelse de durys jumys kerek. Oblys ortalyǵyna jaqyn turǵan Kenjekól aýyly úshin, birinshiden, qoǵamdyq kólikterdiń azdyǵy – úlken másele. Ekinshiden, bir ǵana Veeline munarasy bar, baılanys durys ustamaıdy. Úshinshiden, keıbir turǵyndar qarajattyń tapshylyǵyna baılanysty sý qubyryn úıge deıin kirgize almaı otyr, – deıdi zeınetker Erǵazy Makın.
Pavlodar oblysy