Fransııanyń kóshelerine shyqqan myńdaǵan adam medısınalyq tekserýdi uzartýǵa jáne keıbir mamandyqtar úshin mindetti vaksınalaýǵa qarsy ekendikterin bildirip, narazylyq aksııasyn uıymdastyrdy.
Halyq úkimettiń meıramhanalarǵa, barlarǵa jáne basqa da mádenı jáne demalys oryndaryna kirý úshin medısınalyq tekserýden mindetti túrde ótý týraly sheshimine qarsylyq bildirdi.
Medısınalyq tekserý arqyly azamattyń tolyq vaksınalanǵany, 24 saǵat ishinde koronavırýsqa qatysty saraptamasy oń nátıje bermegeni nemese aldyńǵy alty aıda COVID-pen aýyryp, emdelgeni týraly aqparat jazylǵan anyqtama beriledi. Bul talapty ótken aptada prezıdent Emmanýel Makron halyqtyń ekpe alýyn jedeldetý maqsatynda engizgen. О́ıtkeni úkimet vırýstyń taralýyna tosqaýyl qoıa almaı otyr.
Osy ýaqytta Londonda da júzdegen adam vaksına alǵandarǵa pasport berý josparlaryna narazylyq bildirip, qala ortalyǵyndaǵy mıtıngke shyqty.
ELABE BFMTV 13 shildede saýaldama júrgizip, fransýzdardyń basym kópshiligi (76%) prezıdent Emmanýel Makronnyń vaksınalaýdy medısına qyzmetkerleri, órt sóndirýshiler, qart adamdarmen jumys isteıtinder men taǵy birneshe mamandyq ıeleri úshin mindetti etý, al ekpe almaǵan jaǵdaıda aıyppul salý týraly sheshimin qoldamaıtynyn habarlady.
Narazylyqqa shyqqandar muny alyp tastaýdy talap etti.
Densaýlyq saqtaý mınıstri Olıve Veran Le Parisien oqyrmandaryna indetten qutylýdyń joly osy degen málimdeme jasady.
Fransııanyń ondaǵan qalasy men eldi mekeninde mıtıngiler ótip jatyr. Atap aıtar bolsaq, Valansta, Lıonda, Oserde, Býrg-An-Breste, Grenoblde halyq jappaı aksııalar uıymdastyrýda.