2021 jyldyń 6 aıynda tranzıttik qatynastaǵy konteınerlik tasymaldardyń kólemi 530 myń JFE asty, bul 2020 jyldyń sáıkes kezeńindegi kórsetkishtermen salystyrǵanda 44% artyq. Ortalyq kommýnıkasııalar qyzmetinde ótken brıfıngte QR IIDM Kólik komıteti tóraǵasynyń orynbasary Jánibek Taıjanov osyndaı málimetterdi jarııa etti, dep jazady Egemen.kz.
Búgingi tańda COVID-19 pandemııasy áserinen oryn alǵan ózgeristerdi eskere otyryp, júkterdi «Esikten esikke deıin» shartymen jetkizý tasymaldaýdy uıymdastyrýda mańyzdy tarmaqqa aınaldy. Joǵaryda kórsetilgen sharttar boıynsha júkterdi jetkizýdiń eń tıimdi tásilderiniń biri konteınerlik tasymaldaý. 2013 jyly Qytaı «Bir beldeý, bir jol» bastamasyn jarııalaǵannan keıin ózekti bolǵan konteınerlik aǵyndar úshin kúres úrdisi jyl saıynǵy ósimdi kórsetetin transkontınentaldyq tasymaldardyń damýyna óz úlesin qosty.
Vedomstvo ókiliniń aıtýynsha, osyǵan baılanysty sońǵy jyldary tranzıttik konteınerlik júkter aǵyny úshin kúres kúsheıtilip, tranzıttik dálizderdiń tartymdylyǵyn arttyrý boıynsha sharalar qabyldanýda.
I jartyjyldyqtyń qorytyndysy boıynsha barlyq qatynastardy eskere otyryp, konteınerlik júkterdi temir jol kóligimen tasymaldaý kólemi 800 myńnan astam JFE qurady. О́sim - 36%. Onyń ishinde tranzıttik konteınerlik tasymaldar 44%-ǵa ulǵaıyp, 530 myńnan astam JFE qurady. Jyl sońyna deıingi jospar – 1 mln JFE. 2025 jylǵa deıin bul kórsetkishti 1,6 mln JFE deıin jetkizý kózdelgen.