Saıası arenada birinshi ret aýdandyq deńgeıdegi aýyl, kent, qala ákimderiniń tikeleı saılaýy ótti. Respýblıkanyń 14 oblysynyń 176 aýdanynda 730 aýyl ákimi saılanyp jatyr, jyldyń aıaǵyna deıin 775 ákim saılanady dep kútilýde. Bul – Memleket basshysy Qasym-Jomart Toqaevtyń saıası reformalarynyń naqty, praktıkalyq kórinisi.
Elimizde birte-birte evolıýsııalyq jolmen qoǵamdyq-saıası ózgerister bolyp jatyr. Respýblıka boıynsha saılaýǵa qatysý úshin 2 582 adam kandıdat retinde usynylyp, 2 297-y (88,9 paıyz) tirkeýden ótti. Saılaýǵa elimizde tirkelgen barlyq partııa qatysty. 878 (38,2 paıyz) úmitkerdi partııalar usyndy. Kandıdattardyń basym kópshiligi 1 419-y (61,8 paıyz) – ózin ózi usynýshylar. Bul turǵyndar saılaýdy óziniń azamattyq pozısııasyn bildirýge múmkindik beretin alań retinde qarastyratynyn kórsetedi. Jalpy, qoǵamdyq-saıası reformalar aımaqtarda ótýge tıis, óıtkeni Qazaqstan aımaqtardan turady.
El Prezıdenti Qasym-Jomart Toqaev atap ótkendeı, «Aýyl ákimderiniń saılaýy – bizdegi demokratııany damytýdaǵy mańyzdy qadam». Bul reformalar memleket apparatynyń aýdan, aýyl deńgeıindegi jaýapkershilikti jikteýdi júıeleýi tıis. Atalǵan qadam azamattardyń, qoǵamnyń saıası mádenıetin arttyra otyryp, elimizde saıası plıýralızm prınsıpterin arttyrýǵa septigin tıgizeri sózsiz. Nur Otan partııasy bul saılaýdyń taza, adal ótýine múddeli. Batys áleminiń qaryshtap damýynyń basty trıggeriniń biri – jergilikti ózin ózi basqarý prınsıpteri ekendigi belgili. Aýyl azamattary ákimge daýys berý arqyly óziniń bolashaǵyn, aýyldyń damý jolyn saılaıtynyn túsingendikten, bul naýqanǵa óte jaýapty keldi. Bul saılaý Qazaqstanda osy ózin ózi basqarý prınsıpteriniń alǵysharty bolyp tabylady.
Táýelsizdik alǵan 30 jyldyń ishinde Qazaqstan halqy óz ákimderin tikeleı saılap alý quqyǵyna ıe bolyp otyr. Bul – óte úlken progresshil qadam. Bizdiń kóz aldymyzda tarıhı oqıǵa boldy.
Erlan SAIROV,
Parlament Májilisiniń depýtaty