Túrkistan oblysynyń aýmaǵynda ornalasqan 500-den astam toıhananyń barlyǵyn polısııa qyzmetkerleri kúzetetin bolady. Oblys ákimi О́mirzaq Shókeev óńirdiń tártip saqshylaryna osyndaı tapsyrma berdi, dep habarlaıdy Egemen.kz.
Aımaq basshysynyń tóraǵalyǵymen ótken aptalyq otyrysta vaksınalaý barysyn baqylaý jáne mobıldi toptardyń jumysyn kúsheıtý máseleleri sóz boldy.
Oblysta jyl basynan beri 600-ge tarta toı anyqtalyp, toqtatylǵan.
«Ár toıhananyń aldyna bir-bir polısııa qyzmetkerin qoıý kerek. Bul da aýrýdyń taralýyna jol bermeýdiń tıimdi tásili bolatyn shyǵar. Kúrestiń osy jolyn da kórý kerek. Koronavırýstyń taralýyna jol bermeý úshin jan-jaqtan kúres kúsheıtilsin», dedi oblys ákimi.
О́ńirde sondaı-aq, karantın talaptarynyń saqtalýyn baqylaý boıynsha mobıldi toptardyń monıtorıng jumystary kúsheıtilmek. Osyndaı júıeli jumystardyń nátıjesinde sońǵy aptada tyıym salynǵan 115 otbasylyq, merekelik is-shara anyqtalǵan. Máselen, sońǵy aptada tirkelgen myńǵa jýyq jaǵdaıdyń kópshiligin belsendi jastaǵylar (20-49) quraǵan. Pandemııa bastalǵaly koronavırýs juqtyrǵandardyń 30% astamy qarym-qatynasta bolǵandar, 60% jýyǵy JRVI/pnevmonııa dıagnozymen jáne stasıonarlarǵa josparly/shuǵyl jatqyzylǵandar sanalady.
Sonymen qatar, memlekettik shekaradan ótkender jáne iri kásiporyn jumysshylary, vahtashylar bar. Otyrys barysynda oblysta koronavırýsqa qarsy vaksınasııa qarqyny joǵary deńgeıde ekeni de aıtyldy. Búgingi tanda, barlyq 141 egý pýnktinde koronavırýs ınfeksııasyna qarsy vaksınasııa júrgizilýde. Olar 109 dana termokonteınermen qamtamasyz etilgen. 80 kóshpeli egý brıgadasy jumys isteýde.
О́ńirge vaksınanyń 610 myńǵa jýyq dozasy jetkizilgen. I komponentpen 583 myńǵa jýyq adam nemese óńir turǵyndarynyń 95%, II komponentpen – 404 myńǵa jýyq adam nemese 77% egilgen. Jyl basynan beri oblys boıynsha jasaqtalǵan 127 mobıldi toppen 190 myńnan astam nysan tekserildi. 3,5 myńǵa jýyq hattama toltyrylyp, aıyppul salynǵan.
Aıta keteıik, qajet bolǵan jaǵdaıda óńirde ınfeksııalyq tósek-oryn sanyn 6 myńǵa deıin jetkizýge múmkindik bar.