Qostanaı oblysynda Ashyq júıesiniń kómegimen qoǵamdyq oryndarda, kópshilik ortada erkin qydyryp júrgen «qyzyl» mártebeli – 175, «sary» mártebeli 146 adam anyqtaldy. Olardyń ishinde Lısakov, Rýdnyı, Qostanaı qalalarynyń, sondaı-aq Qostanaı jáne Altynsarın aýdandarynyń turǵyndary bar ekeni anyqtalyp otyr.
– Ol azamattar aınalasyndaǵy adamdarǵa qaýip tóndiretinin jaqsy biledi. Biraq, ókinishke qaraı, úı karantıninde jatqandardyń keıbiri dárigerler qoıǵan talapqa jaýapkershilik tanytpaı, kópshilik oryndarǵa shyǵýyn toqtatar emes. Olardy biz Ashyq qosymshasy arqyly anyqtaımyz. Oń nátıje kórsetkenderdiń bári osy qosymshaǵa engiziledi, – dedi oblystyń bas sanıtarlyq dárigeri Ermuhanbet Dáýletbaev.
Resmı málimetter boıynsha, ótken aptada oblysta úı karantıni tártibin buzǵan 10 adamǵa hattama toltyrylyp, olardyń bári 30 AEK kóleminde aıyppul salý túrindegi ákimshilik jaýapkershilikke tartylǵan. Bas sanıtardyń sózinshe, dál qazir qalǵan tártip buzýshylardy jaýapkershilikke tartý múmkin bolmaı tur, óıtkeni olar áli karantınde jatyr.
– Tártip buzýshylardyń kóbi qazir úı karantıninde jatyr. Olardy jaýapkershilikke tartý úshin biz shaqyrtý jiberýimiz kerek. Bul karantın merzimi aıaqtalǵan soń ǵana múmkin bolady. Úı karantınin buzǵandardyń bárine ákimshilik is qozǵaldy. Jaýapkershilikke tartylǵandardyń birazy óz mártebelerin tekserip kórý úshin smartfondaryn bireýler arqyly berip jibergenin aıtyp jatyr. Mundaı jaǵdaılardyń bári tekseriledi, – dedi bas sanıtarlyq dáriger.
Ashyq arqyly anyqtalǵan jalpy sany 321 «qyzyldyń» 55-i ózge óńirlerdiń turǵyndary eken. Sanıtarlyq-epıdemııalyq baqylaý departamentiniń mamandary olardyń isin ózderi turatyn mekenderdegi quzyrly mekemelerge jibergen. Al syrqattarmen baılanysta bolǵany úshin «sary» mártebesine ıe bolǵandarǵa, qazirshe, aıyppul salynbaıdy, quzyrly organdar olarǵa eskertý berýmen ǵana shektelip otyr.
Úı karantınin buzǵandardyń aty-jóni jalpyǵa qoljetimdi sanıtarlyq-epıdemııalyq baqylaý departamentiniń resmı saıtyna engizildi.
Qostanaı oblysy